Քենիայում հայտնաբերել են աղանդի տասնյակ զոհերի դիեր

Քենիայում հայտնաբերվել են աղանդի մոտ 90 անդամների աճյուններ, որոնց առաջնորդը կոչ է արել իր ուսմունքի հետևորդներին հրաժարվել սնունդից՝ «Հիսուսին հանդիպելու» և դրախտ գնալու համար։ Սովից մահացածների թվում երեխաներ կան։

Երկրի արևելքում գտնվող Շաքահոլ անտառում ողջ մնացածների որոնման և նոր գերեզմանների բացման օպերացիան շարունակվում է արդեն մեկ շաբաթ։ Կիրակի օրը պաշտամունքի հետևորդներից մեկին ողջ են գտել և հյուծված վիճակում տեղափոխել հիվանդանոց։

«Շատերը դեռ ծոմ են պահում, և գուցե ինչ-որ մեկը հենց հիմա մահանում է, չնայած քարոզչի ձերբակալությանը: Այդ իսկ պատճառով մենք կոչ ենք անում կառավարությանը զորքեր ուղարկել այնտեղ»,- ասում է «Հակի Աֆրիկա» իրավապաշտպան կազմակերպության ղեկավար Հուսեյն Խալիդը: Նա նաև հավելել է, որ ինքնաթիռից երևացել են մի խումբ մարդիկ, որոնք թաքնվում են և հրաժարվում են օգնությունից։
Twitter-ում Քենիայի ներքին գործերի նախարարը տեղի ունեցածն անվանել է «զանգվածային սպանություն» և ասել, որ հետախուզման տարածքն այժմ համարվում է «հանցագործության վայր»: Պաշտոնյայի խոսքով՝ «եկեղեցիները, մզկիթները, տաճարներն ու սինագոգները» պետք է լինեն «խիստ հսկողության տակ»։
Քիլիֆի շրջանում երեխաների բարեկեցության կենտրոնի աշխատակից Սեբաստիան Մուտետին էլ հայտնել է, որ երեխաների նկատմամբ հոգատարությունը ծնողների և համայնքի վրա է: Այնինչ նրանց կապել են պարաններով ու սովամահության մատնել։ Սա մեծ ցնցում է երկրի համար, անհավանական դաժանություն:
Հովիվ Մաքքենզին, ով ղեկվարում է այսպես կոչված «Լավ լուրերի միջազգային եկեղեցին» հանձնվել է իշխանություններին ապրիլի կեսերին այն բանից հետո, երբ ոստիկանությունը հայտնել է, որ անտառում չորս դի է հայտնաբերել: 17-ից 49 տարեկան ևս 11 մարդ հոսպիտալացվել է։ Անհետ կորածների թիվը հասնում է 213-ի:

Քարոզչին տարեսկզբին արդեն մեկ անգամ կալանավորել էին այն բանից հետո, երբ լրատվամիջոցները տարածել էին երկու երեխաների մահվան մասին տեղեկությունը, սակայն Մաքենզին գրավի դիմաց ազատ էր արձակվել։ Նրա գործով լսումները պետք է սկսվեն մայիսի 2-ին։