ԱՄՆ-ն ԽՍՀՄ փլուզումից հետո առաջին անգամ վերսկսել է միջուկային մարտագլխիկների արտադրությունը

Ռուսական կողմից պարբերաբար հնչող միջուկային սպառնալիքների և Ռազմավարական սպառազինությունների՝ միակ մնացած պայմանագրից նրա փաստացի դուրս գալու ֆոնին ԱՄՆ-ն վերսկսում է պլուտոնիումի լայնածավալ արտադրությունը։ ԽՍՀՄ-ի փլուզումից հետո առաջին անգամ ԱՄՆ-ն 2023 թվականին կթողարկի տասնյակ նոր միջուկային մարտագլխիկներ, հայտարարել է Միջուկային անվտանգության ազգային վարչությունը (NNSA):
Նախատեսվում է տարեկան 80 պլուտոնիումի միջուկ արտադրելու ծրագիր, որը ռազմավարական և մարտավարական մարտագլխիկների և ռումբերի հիմնական տարրն է:

Նախատեսվում է նաև շարունակել աշխատանքը Եվրոպայում տեղակայված B61-12 միջուկային ռումբերի ծառայության ժամկետի երկարացման և սուզանավերի վրա տեղակայված Trident II միջմայրցամաքային բալիստիկ հրթիռների մարտագլխիկների արդիականացման ուղղությամբ։

Պլուտոնիումի լիցքերի լայնածավալ արտադրությունը դադարեցվեց ԱՄՆ-ում 1989-ին, կարճ ժամանակ առաջ, նախքան Վաշինգթոնը և Մոսկվան համաձայնեցին կրճատել միջուկային զինանոցը և ստորագրեցին Ռազմավարական հարձակողական սպառազինությունների առաջին պայմանագիրը, որն արգելում էր յուրաքանչյուր երկրի ունենալ ավելի քան 6000 մարտագլխիկ:

Պլուտոնիումի արդյունաբերությունը վերագործարկելու համար ԱՄՆ-ն մտադիր է օգտագործել Լոս Ալամոսի լաբորատորիան, որտեղ 1940-ականներին ստեղծվել է առաջին միջուկային ռումբը՝ Ռոբերտ Օփենհայմերի ղեկավարությամբ։ Հաստատությունը, որը գտնվում է Նյու Մեքսիկոյում, կարտադրի տարեկան 30 պլուտոնիումի լիցք։ Եվս 50-ն իշխանությունները մտադիր են արտադրել Սավաննա գետի ազգային լաբորատորիայում, որը նախկինում զբաղվում էր միջուկային զենքի ապաակտիվացման հարցերով: