Զախարովան՝ ՀԱՊԿ-ի հասցեին Փաշինյանի հնչեցրած մեղադրանքների մասին

Պաշտոնական Երևանի կողմից Հավաքական անվտանգության պայմանագրի կազմակերպության քննադատությունը Ռուսաստանում «հակաարդյունավետ» են համարում։ Այս մասին ամենշաբաթյա ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով վարչապետ Նիկոլ Փաշինյանի քննադատական ​​հայտարարությունները ԵՄ և ՀԱՊԿ առաքելությունների վերաբերյալ։
«Հայաստանի ղեկավարության ցանկությունը՝ քննարկել կազմակերպության արդյունավետության հարցերը դրսում, երբ դրա համար ՀԱՊԿ-ն ունի բոլոր անհրաժեշտ ձևաչափերը, փոխգործակցության հաստատված ուղիները, և որ ամենակարևորն է՝ այդ կազմակերպության անդամները պատրաստ են ոչ միայն լսել այս ամենը, այլև աշխատել այս ուղղությամբ»,- ասել է Զախարովան։

Ելույթ ունենալով Պրահայի Տրանսատլանտյան հարաբերությունների կենտրոնում՝ ՀՀ վարչապետ Նիկոլ Փաշինյանը խոսել էր ՀԱՊԿ-ի հետ հարաբերություններում առկա դժվարությունների մասին։ «Հայաստանի և ՀԱՊԿ-ի հարաբերություններում դժվարություններ կան: Անցյալ տարի մենք հյուրընկալեցինք ՀԱՊԿ գագաթնաժողովը, բայց, ցավոք, չկարողացանք կոնսենսուսի հասնել կարևոր որոշումների շուրջ։ Եվ մենք հայտարարեցինք մեր դիրքորոշումը, հայտարարեցինք մեր դժգոհությունը կազմակերպությունից»,- ասել էր նա։ Հայաստանի վարչապետի խոսքով՝ ՀԱՊԿ-ը «չի կարողացել կատարել այն պարտավորությունները, որ ունի Հայաստանի նկատմամբ»։