Ընդգծված աչքեր և հոնքեր. Հայաստանի հավանական սատրապը` Բրիտանական թանգարանում

Ինչպես արդեն հայտնել էինք, Միացյալ Թագավորության Բրիտանական թանգարանում մայիսի 4-ին բացվել է «Շքեղություն և ուժ․ Պարսկաստանից Հունաստան» խորագրով ցուցահանդեսը, որտեղ ցուցադրվում են ցուցանմուշներ նաև Հայաստանի պատմության թանգարանից և «Էրեբունի» պատմահնագիտական արգելոց-թանգարանից:
Ֆեյսբուկյան իր էջում անդրադառնալով ցուցադրությանը՝ «Էրեբունի» պատմահնագիտական արգելոց-թանգարանի տնօրեն Միքայել Բադալյանը նշել է, որ ավելի քան 16 տարի դադարից հետո «Էրեբունի» թանգարանից կրկին ցուցանմուշ է ցուցադրվում արտասահմանյան թանգարանում, այս դեպքում՝ Բրիտանական թանգարանում: Նա նաև նշել է, որ շուրջ մեկ տարի աշխատանք է տարվել, որպեսզի հնարավոր դառնա իրականացնել այս ծրագիրը և որպեսզի թանգարանի ամենանշանավոր ցուցանմուշներից մեկը՝ հեծյալով արծաթե եղջերագավաթը (ռիտոն) ժամանակավորապես ցուցադրվի աշխարհի առաջատար թանգարաններից մեկում:
Բրիտանական թանգարանի բացատրական ծանոթագրության մեջ եղջերագավաթի հեծյալը ներկայացված է որպես «Հայաստանի հավանական սատրապ»:
Հեծյալով եղջերգավաթը հայտնաբերվել է
1968թ.-ին Էրեբունի ամրոցին կից Նոր Արեշ թաղամասում, շինարարական աշխատանքների ընթացքում, ևս երկու այլ եղջերագավաթների հետ:
Թվագրվում է մ.թ.ա. 6-5 րդ դարերով: Հեծյալի բարձր դիրքը ընդգծված է գլխի ու սաղավարտի անսովոր մեծությամբ, շքեղ հագուստով, կողքից կախված դաշույնով: Հեծյալի դեմքին ընդգծված են աչքերն ու հոնքերը, ունի բարակ քիթ: