«Կոռնիձորից հետո ակցիաներ կկազմակերպվեն Սոթքի և Տավուշի ուղղություններով». Արտաշես Մխիթարյան

Կոռնիձորում նախատեսված բողոքի ակցիայի հիմնական նպատակն է՝ ցույց տալ, որ Հայաստանն ու Արցախը միասնական են, պայքարը շարունակվում է, միջոցառումներն էլ՝ հանուն Արցախի, ընդդեմ Ադրբեջանի, շարունակական են լինելու»,- «Փաստինֆո» լրատվականի հետ զրույցում ասում է «Կամավորական շարժում» ՀԿ-ի գումարտակի շտաբի պետ, պահեստազորի սպա Արտաշես Մխիթարյանը։

Հիշեցնենք, որ մայիսի 20-ին ժամը 12-ին «Կամավորական շարժում» հասարակական կազմակերպությունը ծրագրավորում է մեծ ակցիա, որ նախատեսվում է անցկացնել սահմանամերձ Կոռնիձոր համայնքում։ Հասարակական կազմակերպությունը կոչ է անում Արցախի և Հայաստանի առջև ծառացած գոյաբանական խնդիրներով մտահոգ բոլոր քաղաքացիներին՝ կամավորության սկզբունքով՝ սեփական փոխադրամիջոցներով և օրվա սննդով, միանալ արժանապատվության ակցիային և մեկնել Կոռնիձոր։
Արտաշես Մխիթարյանն ասում է՝ ակցիայի անցկացման տեղի ընտրությունը՝ Կոռնիձորը, պայմանավորված է ադրբեջանական կողմի վերջին գործողություններով. «Քանի որ Ադրբեջանը անցակետ տեղադրեց Հակարիի կամրջի հարևանությամբ, այսինքն՝ Կոռնիձորին մոտ՝ կրկնակի շրջափակման մեջ գցելով Արցախի ազգաբնակչությանը, որոշեցինք, որ առաջին ակցիան տեղի է ունենալու հենց այնտեղ։ Քանի որ ստեղծված իրավիճակում Արցախի բնակչությանը մնում է բռնի տեղահանում կամ էթնիկ զտման վտանգի տակ հայտնվել, որոշեցինք, որ առաջիկա կարևոր ակցիան կիրականացնենք հենց շրջափակված Արցախի դարպասների մոտ»։

Արտաշես Մխիթարյանը վստահ է՝ արցախահայությանն, այնուամենայնիվ, հնարավոր չէ ընկճել, նրանք պայքարելու են մինչև վերջ՝ մինչև վերջնական ազատագրում և ինքնորոշում։

Որպես ակցիայի ակտիվ կազմակերպչակական գործողութուններով զբաղված մասնակից, Արտաշես Մխիթարյանն ասում է՝ Կոռնիձորում անցկացվելիք ակցիային մասնակցելու ցանկություն հայտնող բազմաթիվ զանգեր է ստացել։ «Օրական 15-20 զանգ եմ ստանում, մարդիկ հետաքրքված են, ուզում եմ մասնակցել՝ ընկերներով, ընտանիքի անդամներով, կազմակերպություններով։ Իհարկե, այս ակտիվությունն ուրախացնում և հույս է ներշնչում մեզ, որ այս պայքարն անպտուղ չի լինի, որ մենք կհասնենք մեր առջև դրված խնդիրներին։ Ակցիան, բացարձակապես, ապաքաղաքական բնույթ է կրում, սակայն, մասնակցության ցանկություն են հայտնում ինչպես անհատներ, այնպես նաև տարբեր քաղաքական գործիչներ, կուսակցություններ ու նրանց ղեկավարներ։ Մեզ՝ կազմակերպիչներիս համար, բոլորովին միևնույն է, թե ովքեր են ցանկություն հայտնում մասնակցել՝ քաղաքական գործիչներ կլինեն նրանք, անհատ քաղաքացիներ, թե կազմակերպություններ։ Կարևորը, որ նրանց բոլորին միավորում է մեկ գաղափար՝ օգնել Արցախին դուրս գալու այս օրհասկան վիճակից, հավաքվել միևնույն նպատակի շուրջ, այն է՝ «Արցախը մերն է, Արցախը Հայաստան է, Հայաստանն Արցախ է»։ Ակցիան էլ որևէ քաղաքական ուղղվածություն չի ունենալու, հնչելու են միայն «Կամավորական շարժում» ՀԿ-ի լոզունգները»։

Արտաշես Մխիթարյանը հավելում է՝ Կոռնիձորում իրականացվելիք ակցիան միակը չի լինելու, այն կունենա շարունակություն։ Հաջորդ ակցիաներն անցկացվելու են, այս պահի դրությամբ, Հայաստանի առավել վտանգված հատվածներում։ Նախատեսվում է հաջորդիվ նույն նպատակով ակցիա իրականացնել դեպի Սոթք և Տավուշ ուղղություններով, հետագա ուղղությունները դեռևս ճշտվում են։

Առավել մանրամասն՝ սկզբնաղբյուրում: