Ուկրաինան հայտարարել է Բախմուտի ուղղությամբ կռված 106 զինվորների ռուսական գերությունից վերադարձնելու մասին

Ռուսական գերությունից Ուկրաինա է վերադարձել 106 զինվոր, այս մասին հայտարարել է Ուկրաինայի նախագահի աշխատակազմի ղեկավար Անդրեյ Երմակը։

Նրա խոսքով՝ Ուկրաինա վերադարձածների թվում են 8 սպա և 98 զինվոր ու սերժանտ, որոնք կռվել են Բախմուտի ուղղությամբ։ Վերադարձածներից շատերն անհայտ կորած են համարվել, հավելել է նա։

Իր հերթին Ռուսաստանում մարդու իրավունքների պաշտպան Տատյանա Մոսկալկովան հաստատել է Ուկրաինայի հետ գերիների փոխանակումը և ասել, որ ռուսական կողմից գերիների փոխանակումն իրականացրել է Վագներ ՄՌԿ-ն։ Ռուսաստանի Դաշնության պաշտպանության նախարարությունը չի մեկնաբանել այսօր գերիների փոխանակումը։
Ապրիլի 26-ին Ուկրաինայի նախագահ Վլադիմիր Զելենսկին հայտնել է, որ Ռուսաստանի կողմից Ուկրաինայի դեմ սանձազերծված պատերազմի ողջ ընթացքում ռուսական գերությունից ազատվել է 2279 ուկրաինացի։