Երկուշաբթի, 20 ապրիլի, 2026 թ.
|
Ստեփանակերտում`   +8 °C

Խաչատրյանի անվան 19-րդ միջազգային մրցույթի բացման համերգին ելույթ կունենա բրիտանացի վիրտուոզ ջութակահարուհի Ջենիֆեր Փայքը

Խաչատրյանի անվան 19-րդ միջազգային մրցույթի բացման համերգին ելույթ կունենա բրիտանացի վիրտուոզ ջութակահարուհի Ջենիֆեր Փայքը
536
Հինգշաբթի, 01 հունիսի, 2023 թ., 02:12

Հունիսի 6-ին կմեկնարկի Խաչատրյանի անվան 19-րդ միջազգային մրցույթը, որը 2023 թվականին նվիրվում է Արամ Խաչատրյանի 120-ամյա հոբելյանին և այս տարի կանցկացվի դաշնամուրի մասնագիտական կարգում, իսկ մրցույթի փուլերը կանցկացվեն հունիսի 7-ից 12-ն Արամ Խաչատրյան համերգասրահում և Կոմիտասի թանգարան-ինստիտուտում։

Մրցույթի բացման արարողությունը և համերգը, ավանդույթի համաձայն, տեղի կունենան հունիսի 6-ին՝ մեծ կոմպոզիտորի ծննդյան օրը։
Հայաստանի պետական սիմֆոնիկ նվագախումբը Խաչատրյանի անվան միջազգային մրցույթի պաշտոնական նվագախումբն է։ Մրցույթի բացման համերգին կհնչեն Արամ Խաչատրյանի Ջութակի կոնցերտը և հատվածներ «Սպարտակ» բալետից։ Հայաստանի պետական սիմֆոնիկ նվագախմբի հետ ելույթ կունենա բրիտանացի վիրտուոզ ջութակահարուհի Ջենիֆեր Փայքը։ Համերգը կղեկավարի դիրիժոր Սերգեյ Սմբատյանը։

Խաչատրյանի անվան մրցույթն անցկացվում է «Արամ Խաչատրյան» մշակութային հիմնադրամի կազմակերպմամբ և ՀՀ ԿԳՄՍ նախարարության աջակցությամբ։ Մրցույթը 2013 թվականից Ժնևում հիմնված Միջազգային երաժշտական մրցույթների համաշխարհային ֆեդերացիայի (WFIMC) անդամ է և գործում է ֆեդերացիայի սահմանած կանոններով։

Այս տարի Խաչատրյանի անվան միջազգային մրցույթին կմասնակցի 22 դաշնակահար 7 երկրից։