«Առաջին անգամ Հայաստանի ղեկավարը Ղարաբաղը ճանաչեց Ադրբեջանի մաս». Բորել

Այսօր Եվրոխորհրդարանում Ադրբեջանի կողմից Լեռնային Ղարաբաղի շրջափակման պատճառով ստեղծված իրավիճակի քննարկման ժամանակ ԵՄ դիվանագիտության ղեկավար Ժոզեպ Բորելը ասել է, որ «երկու կողմերն էլ (Հայաստանը և Ադրբեջանը - խմբ.) ճանաչեցին միմյանց տարածքային ամբողջականությունը կոնկրետ դրսևորումներով, և հավանաբար, շատ կարևոր է այն փաստը, որ առաջին անգամ Հայաստանը Ղարաբաղը ներառեց Ադրբեջանի տարածքում»։

«Սա առաջին անգամն է, որ Հայաստանի ղեկավարը, տվյալ դեպքում Փաշինյանը, դա արտահայտում է նման միանշանակ կերպով։ Դա միանգամայն միանշանակ էր»,- ընդգծել է Բորելը։

Այդ կապակցությամբ նա հույս է հայտնել, որ Բաքուն կընդունի Հայաստանի վարչապետի ուղերձը և Լեռնային Ղարաբաղի հայերին կուղարկի «դրական նարատիվ՝ իրենց իրավունքների, անվտանգության վերաբերյալ հստակ ուղերձով, որ դրանք լիովին կհարգվեն»։

«Սա համաձայնագրի մեսիջներից մեկն է, որը պետք է զուգահեռ ընթանա բանակցային գործընթացի այլ կետերի հետ»,- ասել է Բորելը։