Հինգշաբթի, 05 նոյեմբերի, 2026 թ.
|
Ստեփանակերտում`   +13 °C

Պուտինը հանդես է եկել ուղերձով՝ կապված «Վագներ»-ի ապստամբության հետ

Պուտինը հանդես է եկել ուղերձով՝ կապված «Վագներ»-ի ապստամբության հետ
444
Երկուշաբթի, 26 հունիսի, 2023 թ., 23:48

Հունիսի 26-ի երեկոյան ՌԴ նախագահ Վլադիմիր Պուտինը դիմել է ժողովրդին, որի ընթացքում մեկնաբանել է «Վագներ»-ի հիմնադիր Եվգենի Պրիգոժինի կազմակերպած զինված ապստամբությունը։

Պուտինի հայտարարության հիմնական թեզերը՝ ստորև.

*Ռուսական հասարակությունն ու իշխանությունները ցույց են տվել «սահմանադրական կարգի պաշտպանության ամենաբարձր համախմբումը»։ Ռուսաստանի Դաշնության նախագահի խոսքով, «բոլորին միավորել է հայրենիքի ճակատագրի պատասխանատվությունը»։

*Ապստամբության կազմակերպիչները դավաճանեցին ինչպես իրենց ժողովրդին, այնպես էլ նրանց, ովքեր ներքաշված էին այս հանցագործության մեջ։ ««Վագներ» խմբավորման մարտիկների ճնշող մեծամասնությունը Ռուսաստանի հայրենասերներն են և խիզախորեն կռվել են նրա շահերի համար»։

Պուտինն առաջարկել է նրանց կամ շարունակել ծառայությունը ՊՆ շարքերում, կամ գնալ տուն, կամ գնալ Բելառուս։

«Ով ուզում է, կարող է գնալ Բելառուս։ Իմ տված խոստումը կկատարվի. կրկնում եմ՝ ընտրությունը ձերն է, բայց վստահ եմ, որ դա կլինի ռուս զինվորների ընտրությունը, ովքեր հասկացել են իրենց ողբերգական սխալը»,- ասել է Պուտինը։

Ուղերձում Ռուսաստանի Դաշնության նախագահը, առանց անուններ տալու, հայտարարել է, որ ապստամբության կազմակերպիչները դավաճանել են իրենց երկիրը, ժողովրդին և «հանցագործության մեջ ներքաշվածներին»։ «Զինված ապստամբությունը ամեն դեպքում կճնշվեր։ Ապստամբության կազմակերպիչները, չնայած ադեկվատության կորստին, չէին կարող դա չհասկանալ»,- ասել է Պուտինը:

Նա նաև շնորհակալություն է հայտնել Բելառուսի նախագահ Ալեքսանդր Լուկաշենկոյին իրավիճակի խաղաղ կարգավորման գործում ներդրած ավանդի համար։

Ռուսաստանի Դաշնության նախագահի ելույթը տևել է հինգ րոպեից մի փոքր ավելի։