ԱԻ փոխնախարարներն ազատվել են պաշտոններից

Ղեկավարվելով «Հանրային ծառայության մասին» օրենքի 9-րդ հոդվածի 1-ին մասով, ինչպես նաև հիմք ընդունելով «Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին» 2022 թվականի դեկտեմբերի 16-ի ՀՕ-457-Ն օրենքի 4-րդ հոդվածի 8-րդ մասը, ՀՀ վարչապետը որոշել է Արա Նազարյանին ու Արտյուշ Գրիգորյանին 2023 թվականի հունիսի 30-ից ազատել Արտակարգ իրավիճակների նախարարի տեղակալի պաշտոններից:

Հիշեցնենք՝ ավելի վաղ ԱԻՆ-ը հայտնել էր, որ սույն թվականի հունիսի 30-ից դադարեցվում է գերատեսչության գործունեությունը: Համաձայն 2022 թվականի դեկտեմբերի 16-ին ընդունված «Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին ՀՀ օրենքի՝ ստեղծվել է Ներքին գործերի նախարարություն, որն իր մեջ ներառում Է նաև Արտակարգ իրավիճակների նախարարության գործառույթները:

ՀՀ վարչապետ Նիկոլ Փաշինյանն այսօր՝ հունիսի 29-ին, կառավարության նիստի ժամանակ շնորհակալություն է հայտնել նաև Արտակարգ իրավիճակների նախարար Արմեն Փամբուխչյանին կատարած աշխատանքի համար՝ հիշեցնելով, որ Փամբուխչյանը որպես նախարար վերջին անգամ է մասնակցում գործադիր մարմնի նիստին։