Երկուշաբթի, 23 փետրվարի, 2026 թ.
|
Ստեփանակերտում`   +6 °C

Նիկոլ Փաշինյանի ելույթը սպառիչ էր և լրացման կարիք չկա. վարչապետի աշխատակազմ

Նիկոլ Փաշինյանի ելույթը սպառիչ էր և լրացման կարիք չկա. վարչապետի աշխատակազմ
447
Երեքշաբթի, 04 հուլիսի, 2023 թ., 22:30

ՀՀ վարչապետի մամուլի քարտուղար Նազելի Բաղդասարյանը «Հայկական ժամանակ»-ի հետ զրույցում արձագանքել է նախկին արտգործնախարար Վարդան Օսկանյանի հայտարարություններին՝ կապված 44-օրյա պատերազմի քննիչ հանձնաժողովում Նիկոլ Փաշինյանի արած հայտարարությունների հետ:

«Իրականում վարչապետ Նիկոլ Փաշինյանի՝ քննիչ հանձնաժողովում ունեցած ելույթից և հարցուպատասխանից հետո չի եղել մինչ օրս որևէ մեկնաբանություն, որին լրացուցիչ արձագանքելու կարիք ենք տեսնում:

Ընդհանուր առմամբ բոլոր մեկնաբանությունների համատեքստում կարող ենք արձանագրել, որ ՀՀ վարչապետի ելույթը սպառիչ էր և որևէ լրացման կարիք չկա»,-ասաց մամուլի քարտուղարը:

Նշենք, որ Վարդան Օսկանյանը, անդրադառնալով 44-օրյա պատերազմի քննիչ հանձնաժողովում վարչապետ Նիկոլ Փաշինյանի արած հայտարարություններին, այսօր հայտարարել էր.

«Անկախ նրանից, թե Նիկոլ Փաշինյանը ինչ կասի և ինչպես կմեկնաբանի, այդպիսի բան չի եղել։ Փաշինյանն է ՀՀ-ի առաջին ղեկավարը, որ նման բան է ասել ու հիմա փորձում է դա ֆորմալիզացնել՝ համապատասխան փաստաթղթերը ստորագրելու համար: Այսօր այլընտրանք կա այն ամենին, ինչը փորձում է անել Փաշինյանը։ Պատերազմը, որը հաճախ մեզ փորձում են մատուցել որպես անխուսափելի, բացառված էր։ Պատերազմը Փաշինյանն է բերել մեր ժողովրդի գլխին իր սխալների պատճառով, ուղղակի վստահ եմ դրանում»: