Հայտնի է, թե քանի մարդ է ստորագրել «Հայաքվեի» նախաձեռնությունը. «Հրապարակ»

«Հրապարակ»-ը գրում է. «Անցած շաբաթվանից «Հայաքվե» նախաձեռնության շրջանակում մեկնարկել է ստորագրահավաքը: Այսօր նախաձեռնողները հանդես են գալու հաշվետվությամբ՝ տեղեկացնելով, թե քանի մարդ է ստորագրել նախաձեռնության շրջանակներում։
Երեկ երեկոյան բոլոր տեղամասերից տվյալներ են հավաքագրել, հաշվարկել: Մեզ հայտնի դարձավ, որ հինգ աշխատանքային օրվա հաշվարկով, Երևանում և որոշ մարզերում մոտ 15 հազար մարդ է ստորագրել:

Հիշեցնենք՝ «Հայաքվե» նախաձեռնությունը մտադիր է հանդես գալ օրենսդրության փոփոխության պահանջով. որով խիստ պատիժ՝ 10-15 տարի, կսահմանվի այն պաշտոնատար անձանց նկատմամբ, որոնք Արցախի ինքնորոշումից հրաժարվելու և Հայոց ցեղասպանության նշանակությունը նսեմացնելու որոշում կընդունեն: Որպեսզի օրենսդրական նման փոփոխություն լինի, պետք է 50 հազար քաղաքացու ստորագրություն:

Օրենքը 60-օրյա ժամկետ է նախատեսում: ԿԸՀ-ն որոշել է այդ ժամկետը նշանակել 2023թ. հունիսի 19-ից մինչև օգոստոսի 19-ը: Այնուհետև նրանք կդիմեն ԿԸՀ, որը պետք է հաստատի ստորագրությունների իսկությունը, ինչից հետո ներկայացվելու է Ազգային ժողովին։ Եթե խորհրդարանը մերժի, հաջորդ քայլը 300 հազար ստորագրությամբ հարցը հանրաքվեի կդրվի»: