Զելենսկին Ուկրաինայի Ազգային գվարդիայի նոր հրամանատար է նշանակել

Ուկրաինայի նախագահ Վլադիմիր Զելենսկին գնդապետ Ալեքսանդր Պիվնենկոյին նշանակել է Ուկրաինայի Ազգային գվարդիայի նոր հրամանատար, հայտնում է ուկրաինական Strana.ua թերթը։

Նշվում է, որ 2023 թվականի մարտին Պիվնենկոն ստացել է Ուկրաինայի հերոսի կոչում։ Եղել է Ազգային գվարդիայի 3-րդ օպերատիվ բրիգադի հրամանատարը, որը մասնակցել է Բախմուտի համար մղվող մարտերին (քաղաքի ռուսերեն անվանումը՝ Արտեմովսկ)։

Պիվնենկոյի նախորդը Յուրի Լեբեդն էր։ 2022 թվականի հունվարին, երբ Ազգային գվարդիայի ժամկետային զինծառայողը գնդակահարեց հինգ մարդու Դնեպրի Յուժմաշ գործարանում, Զելենսկին երկու հրամանագիր ստորագրեց։ Նա մեկ հրամանագրով Միկոլա Բալանին ազատեց Ուկրաինայի ազգային գվարդիայի հրամանատարի պաշտոնից։ Մեկ այլով Լեբեդը նշանակվեց Ուկրաինայի ազգային գվարդիայի հրամանատարի ժամանակավոր պաշտոնակատար։

Հունվարի 27-ին ուկրաինական Դնեպրում ժամկետային զինծառայողը զինապահեստից հանել էր ԱԿ-47 ինքնաձիգը և կրակ բացել պահակատանը, որտեղ ավելի քան 20 մարդ է եղել։ Միջադեպի հետևանքով զոհվել է 5 մարդ, այդ թվում՝ մեկ քաղաքացիական անձ: Եվս 5 մարդ ստացել է տարբեր ծանրության վնասվածքներ։ Հանցագործությունից հետո զինծառայողը զենք-զինամթերքով դիմել էր փախուստի դեպքի վայրից։