«Տեղի ունեցածը գալիս է լրացնելու ոստիկանական բեսպրեդելի շարքը». Տիգրան Աբրահամյան

Ինչպես հայտնել էինք, գյումրեցի իրավապաշտպան Կարապետ Պողոսյանը նախօրեին ահազանգել էր, որ հարձակման է ենթարկվել ոստիկանի կողմից. «Ոստիկանության Մուշի բաժնի քրեականի աշխատող Արտակ Պողոսյանը, ցուցաբերելով բացահայտ ցինիզմ, խուլիգանության ակնհայտ դրսևորմամբ հարձակվել է վրաս՝ Գյումրիի Պ. Սևակ փողոցում գտնվող խանութում, որտեղ առկա են նաև տեսախցիկներ»,- մասնավորապես նշել էր Պողոսյանը:

ԱԺ պատգամավոր Տիգրան Աբրահամյանը ֆեյսբուքյան իր էջում անդրադարձել է տեղի ունեցածին. «Ինչո՞ւ է ոստիկանության աշխատողն իրեն թույլ տալիս օրը ցերեկով հարձակում գործել քաղաքացու նկատմամբ: Պատասխանը շատ հստակ է, քանի որ գիտի՝ անպատժելիություն է:
Այն, ինչ մեկ օր առաջ Գյումրիում տեղի է ունեցել Կարապետ Պողոսյանի հետ, գալիս է լրացնելու ոստիկանական բեսպրեդելի այն շարքը, որին անընդհատ ականատես ենք դառնում:
Հասարական անվտանգություն ապահովելու փոխարեն ոստիկանությունը հակառակ գործառույթն է ստանձնել՝ կարգի կոպիտ խախտում և բռնություն քաղաքացու նկատմամբ»: