«Ուկրաինան կարող է ավելի շատ տարածքներ կորցնել». Մասքի հայտարարությունն սկանդալ է առաջացրել

Ամերիկացի միլիարդատեր և գյուտարար, SpaceX-ի և Tesla-ի հիմնադիր Իլոն Մասքը խոսել է Ուկրաինայի հակահարձակման մասին և ափսոսացել կյանքի ծաղիկ հասակում գտնվող ռուս և ուկրաինացի երիտասարդների համար: Twitter-ում նա գրել է, որ ուկրաինական հակահարձակման «ձախողման» դեպքում Ռուսաստանի Դաշնությունը կկարողանա գրավել էլ ավելի շատ տարածքներ։

Գործարարն ասել է, որ խրամատներում, «չունենալով տարածքային ձեռքբերումներ, մեռնում է ռուս ու ուկրաինացի երիտասարդության ծաղիկը»։

«Որ կողմն էլ հարձակման անցնի ուժեղ ամրացված դիրքերի դեմ, շատ ավելի շատ զինվորներ կկորցնի: Ավելին, Ռուսաստանը թվաքանակով ~ 4:1 գերազանցում է Ուկրաինային, այնպես որ նա կհաղթի քայքայման պատերազմում, եթե նույնիսկ կորուստները հավասար լինեն», - կարծում է Մասքը:

Նա նաև առաջարկում է, որ «եթե ուկրաինական հարձակումը ձախողվի մեծ կորուստներով», ապա Ռուսաստանը «շատ ավելի շատ տարածքներ կգրավի» իր հակագրոհի ժամանակ։ Միլիարդատիրոջ խոսքով՝ հենց այդ գործոնն է Ուկրաինայի զինված ուժերին հետ պահում լայնածավալ հակահարձակումից։