Բլինքենը վստահեցրել է, որ Ուկրաինան աջակցության «հզոր փաթեթ» կստանա ՆԱՏՕ-ի գագաթնաժողովում

Ուկրաինան «քաղաքական և գործնական» աջակցության հզոր փաթեթ կստանա Վիլնյուսում կայանալիք ՆԱՏՕ-ի գագաթնաժողովում, հայտարարել է ԱՄՆ պետքարտուղար Էնթոնի Բլինքենը։

Նրա խոսքով, դաշինքում դաշնակիցները կցուցաբերեն «իրենց անսասան աջակցությունն Ուկրաինային, ներառյալ անդամակցության փաստը»։

Բլինքենն ասել է, որ ՆԱՏՕ-ին անդամակցելու ուղղությամբ Ուկրաինայի առաջընթացը կարտացոլվի նրանում, թե ինչ է արվելու «գագաթնաժողովի ավարտին, ինչպես նաև այն, ինչ մնում է անել»։

«Կարծում եմ, բոլորը, ներառյալ նախագահ Զելենսկին, հստակ հասկանում են, որ պատերազմի պայմաններում դաշինքին անդամակցելը հնարավոր չէ, բայց նրանք իրական առաջընթաց են գրանցել, և դաշինքը նախանշում է հետագա բարեփոխումներ թե՛ անվտանգության, թե՛ ժողովրդավարության ոլորտներում, և անհրաժեշտ է առաջ շարժվել այս ճանապարհով»,- ասել է Բլինքենը:

Բլինքենը մեկնաբանություններ է արել այն բանից հետո, երբ Ուկրաինայի նախագահ Վլադիմիր Զելենսկին ասել է, որ ՆԱՏՕ-ի դաշնակիցները «պատրաստ չեն» Ուկրաինային դաշինք հրավիրել: