Երկուշաբթի, 23 փետրվարի, 2026 թ.
|
Ստեփանակերտում`   +9 °C

«Հայկական կողմը հասկանում է, որ անհրաժեշտ է համոզել Լեռնային Ղարաբաղի հայերին». Լավրով

«Հայկական կողմը հասկանում է, որ անհրաժեշտ է համոզել Լեռնային Ղարաբաղի հայերին». Լավրով
599
Չորեքշաբթի, 26 հուլիսի, 2023 թ., 00:12

Ռուսաստանի արտգործնախարար Սերգեյ Լավրովը, ներկայացնելով Ադրբեջանի և Հայաստանի արտգործնախարարներ Ջեյհուն Բայրամովի և Արարատ Միրզոյանի հետ բանակցությունների արդյունքները, ասել է, որ հույս ունի բանակցային գործընթացի շարունակության վրա, որը պետք է ավարտվի Բաքվի և Երևանի միջև խաղաղության պայմանագրի ստորագրմամբ: Նա նաև ասաց, որ այս տարի նախատեսվում է անցկացնել Ռուսաստանի Դաշնություն-Ադրբեջան-Հայաստան գագաթնաժողովը։

«Մենք ակնկալում ենք, որ բանակցային գործընթացը կշարունակվի: Մենք հասկանում ենք և՛ հայկական, և՛ ադրբեջանական կողմերի շահագրգռվածությունը միջնորդներ օգտագործել ոչ միայն ի դեմս Ռուսաստանի, այլև այլոց: Մենք ողջունում ենք նրանց ցանկությունը, ովքեր անկեղծորեն շահագրգռված են՝ օգնել Բաքվին և Երևանին համաձայնագրեր գտնելու հարցում, ովքեր, ինչպես մենք, աշխատում են այս ուղղությամբ: Բայց պետք է փորձեր արվեն հայ և ադրբեջանցի ժողովուրդների շահերից ելնելով, այլ ոչ թե հանուն լրատվամիջոցների գեղեցիկ վերնագրերի, հանուն աշխարհաքաղաքական և ներքաղաքական նկատառումների»,- ասել է Լավրովը։

Նա նշել է, որ «բազմաթիվ բարդ և կարևոր հարցեր պետք է լուծվեն: Դրանցից ամենազգայունը եղել և մնում է Լեռնային Ղարաբաղի հայերի իրավունքների և անվտանգության երաշխավորման խնդիրը՝ Ադրբեջանի տարածքային ամբողջականության ապահովման համատեքստում՝ 1991թ. Ալմա-Աթիի խաղաղության պայմանագրի համաձայն»։

«Հայկական կողմը հասկանում է, որ անհրաժեշտ է համոզել Լեռնային Ղարաբաղի հայերին՝ Ադրբեջանի ներկայացուցիչների հետ հնարավորինս շուտ հանդիպումներ ունենալ ու համաձայնեցնել համապատասխան օրենսդրությունից և միջազգային պարտավորություններից (այս դեպքում՝ Ադրբեջանի) բխող իրավունքները, ներառյալ ազգային փոքրամասնությունների իրավունքների ապահովման բազմաթիվ կոնվենցիաները»,- ասել է Լավրովը։

Նրա խոսքով, «ադրբեջանական կողմը պատրաստ է փոխադարձ հիմունքներով նույն երաշխիքները տրամադրել իր տարածքում բնակվող անձանց նկատմամբ: Հայերը պատրաստ են նույնը անել Հայաստանի Հանրապետությունում բնակվող քաղաքացիների նկատմամբ՝ բոլոր կոնվենցիաների կիրառման հարցում»:

Լավրովն ասել է, որ «ամենամոտ արդյունքը այս փուլում եռակողմ աշխատանքային խմբում համաձայնության ձեռքբերումն է՝ երեք փոխվարչապետների գլխավորությամբ, որոնք զբաղված են տարածաշրջանում տրանսպորտային հաղորդակցությունների ապաշրջափակման կոնկրետ հարցերի համաձայնեցմամբ։

«Մենք պայմանավորվեցինք փորձել վերսկսել երկխոսությունը քաղաքացիական հասարակության ներկայացուցիչների, քաղաքագետների միջև: Մենք նաև հույս ունենք (այսօր մենք դա առաջարկել ենք) եռակողմ երկխոսություն սկսել խորհրդարանականների միջոցով», - ասել է Լավրովը:

Նա նաև ասել է, որ «այս տարի նախատեսվում է անցկացնել Ռուսաստանի, Ադրբեջանի և Հայաստանի ղեկավարների ևս մեկ գագաթնաժողով»։