Աֆրիկայի առաջնորդների երկու երրորդը չեն այցելել Պուտինին. Կրեմլը մեղադրում է Արևմուտքին

Ռուսաստան-Աֆրիկա համաժողովում պետությունների ղեկավարների սակավ թիվը ԱՄՆ-ի, Ֆրանսիայի և այլ պետությունների «լկտի միջամտության» արդյունքն էր, չորեքշաբթի ասել է Կրեմլի խոսնակ Դմիտրի Պեսկովը։

«Նրանք դիվանագիտական ​​առաքելությունների միջոցով փորձեր են արել ճնշում գործադրել այդ երկրների ղեկավարության վրա՝ կանխելու համար նրանց մասնակցությունը ֆորումին»,- ասել է Պեսկովը ճեպազրույցում:

Ըստ Պեսկովի՝ Արևմուտքի միջամտությունը «միանգամայն աղաղակող» փաստ է, որը, սակայն, «ոչ մի կերպ չի խանգարում գագաթնաժողովի անցկացմանը»։ Հուլիսի 27-ին Սանկտ Պետերբուրգում մեկնարկող միջոցառումը լինելու է շատ հագեցած և արդյունավետ, վստահեցրել է նախագահի խոսնակը:

Աֆրիկայի 54 երկրներից միայն 17-ն են պատվիրակություններ ուղարկել գագաթնաժողովին՝ պետությունների ղեկավարների մասնակցության մակարդակով, ևս 10-ը՝ վարչապետերի։ Սա կեսն է 2019-ի նմանատիպ ֆորումի մասնակիցների, որտեղ ամենաբարձր մակարդակով ներկայացված էին աֆրիկյան 45 երկրներ։

5 պետություն ընդհանրապես հրաժարվել է մասնակցել գագաթնաժողովին, իսկ կեսը պատվիրակել է մասնակցությունը երկրորդ կարգի պաշտոնյաներին. 17 երկիր ներկայացված է փոխվարչապետերով և նախարարներով, իսկ 5-ը՝ պարզապես դեսպաններով։

Ուշակովի խոսքով՝ Պուտինն անձամբ ծրագրում է հանդիպել աֆրիկյան պետությունների ղեկավարներից յուրաքանչյուրի հետ։ Նախատեսվում են բանակցություններ Եգիպտոսի, Մոզամբիկի, Բուրունդիի, Զիմբաբվեի, Ուգանդայի, Էրիթրեայի, Կենտրոնական Աֆրիկյան Հանրապետության, Լիբիայի, Կամերունի, Սենեգալի, Հարավային Աֆրիկայի, Բուրկինա Ֆասոյի, Գվինեա-Բիսաուի, Մալիի, Կոնգոյի նախագահների հետ։ Հուլիսի 28-ին Պուտինը մեծ ելույթ կունենա, որում կխոսի բոլոր պետությունների «բազմաբևեռության և հավասարության» վրա հիմնված «նոր աշխարհակարգի» ձևավորման մասին, ասել է Ուշակովը։