Շոյգուն ծրագրում է զենք գնել Հյուսիսային Կորեայից. ԱՄՆ

Վաշինգթոնը կարծում է, որ ՌԴ պաշտպանության նախարար Սերգեյ Շոյգուն մտադիր է Հյուսիսային Կորեայից զենք գնել իր երկրի համար։ ԱՄՆ պետքարտուղար Էնթոնի Բլինքենը շաբաթ օրը՝ հուլիսի 29-ին, Ավստրալիա կատարած այցի ժամանակ ասել է, որ խիստ կասկածում է, որ Շոյգուն «հանգստանում է» Հյուսիսային Կորեայում։ «Մենք տեսնում ենք, որ Ուկրաինայի դեմ ագրեսիան շարունակելու համար Ռուսաստանը ծայրահեղ կարիք ունի աջակցության, զենքի, որտեղ նա կարող է գտնել դրանք»,- ասել է Բլինքենը։ Նա նշել է, որ խոսքը ոչ միայն Հյուսիսային Կորեայի, այլ նաև Իրանի մասին է, «որը Ռուսաստանին մատակարարել է մեծ քանակությամբ անօդաչու սարքեր», որոնք Մոսկվան օգտագործում է «Ուկրաինայում քաղաքացիական ենթակառուցվածքները ոչնչացնելու և խաղաղ բնակիչներին սպանելու համար»։

Մի քանի օր առաջ՝ հուլիսի 26-ին, Շոյգուն ժամանել էր Հյուսիսային Կորեա՝ նշելու Կորեական պատերազմի ավարտի 70-ամյակը։ Կորոնավիրուսի համաճարակից հետո Փհենյան կատարած իր առաջին պաշտոնական այցի ընթացքում նա հանդիպել է Հյուսիսային Կորեայի առաջնորդ Կիմ Չեն Ինի հետ։

Հյուսիսային Կորեան ի սկզբանե աջակցել է Ուկրաինայում ռուսական ագրեսիային և, ըստ ԱՄՆ հետախուզության, զենք է մատակարարել Ռուսաստանին։ Փհենյանը հերքում է այս մեղադրանքները։