Բաքուն Երևանին մեղադրում է սադրանքներ կազմակերպելու մեջ

Ադրբեջանի ԱԳՆ-ն հայտարարություն է տարածել՝ հայտնելով, որ օգոստոսի 16-ին Հայաստանի զինված ուժերի հետախուզադիվերսիոն խումբը փորձել է ներխուժել Ադրբեջանի տարածք՝ ահաբեկչական-դիվերսիոն գործողություն իրականացնելու նպատակով:

«Հայաստանի հերթական սադրանքը կանխվել է, իսկ դիվերսիոն խմբի անդամը բերման է ենթարկվել»,- ասվում է հաղորդագրութայն մեջ:

Դատապարտելով Հայաստանի կողմից «ռազմական սադրանքների իրականացումը» ՄԱԿ-ի Անվտանգության խորհրդի նիստի օրը, Ադրբեջանը կոչ է արել Հայաստանին՝ «զերծ մնալ տարածաշրջանում իրավիճակը սրող սադրիչ գործողություններից և հայտարարություններից, չմիջամտել Ադրբեջանի ներքին գործերին և կատարել իր պարտավորությունները՝ չշարունակելով միջազգային հանրությանը շփոթեցնելու փորձերը»։

«Տարածաշրջանում իրավիճակի սրման պատասխանատվությունն ուղղակիորեն կրում է Հայաստանի ռազմաքաղաքական ղեկավարությունը»,- նշում է Ադրբեջանի ԱԳՆ-ն:

Նշենք, որ ՀՀ-ն արդեն հերքել է դիվերսիոն ներթափանցման փորձ կատարելու մասին ադրբեջանական հաղորդագրությունը։