Ադրբեջանը բողոքի նոտա է հղել ՌԴ ԱԳՆ-ին «հակաադրբեջանական սադրանքի» համար

Ռուսաստանում Ադրբեջանի դեսպանատունը հայտարարություն է տարածել՝ կապված 2023 թվականի օգոստոսի 7-ին Եկատերինբուրգում Թալիշ-Մուղանական Ինքնավար Հանրապետության կազմավորման 30-ամյակի ապակցությամբ կազմակերպված միջոցառման հետ։

Դեսպանատան հաղորդագրության մեջ ասվում է. «Ադրբեջանի դիվանագիտական ​​գերատեսչությունը նշում է, որ «ռուսական կողմի ուշադրությանն է ներկայացվել, որ նման սադրիչ բնույթի միջոցառման կազմակերպումը և դրան Եկատերինբուրգի քաղաքային դումայի նախագահ Իգոր Վոլոդինի հյուրի կարգավիճակով մասնակցությունն անընդունելի է։ Ռուսաստանի իշխող կուսակցության ներկայացուցչի այս քայլը խթանում է անջատողականությունը, հիմնովին հակասում է Ադրբեջանի և Ռուսաստանի դաշնակցային փոխգործակցության ոգուն, ինչպես նաև վնասում է երկկողմ համագործակցությանը»։

Ռուսաստանում Ադրբեջանի դեսպանատունը կոչ է անում «անհետաձգելի միջոցներ ձեռնարկել Իգոր Վոլոդինի և այս միջոցառման կազմակերպիչների նկատմամբ, ինչպես նաև միջոցներ ձեռնարկել ապագայում Ադրբեջանի տարածքային ամբողջականության և ինքնիշխանության դեմ ուղղված նման սադրիչ քայլերը կանխելու համար։ Դեսպանությունն այս պահին սպասում է ռուսական կողմից պաշտոնական պատասխանին»։