Սպիտակ տունը կհայտարարի աղքատացված ուրանի արկեր Ուկրաինային փոխանցելու մասին. Politico

Սպիտակ տունը չորեքշաբթի օրը՝ սեպտեմբերի 6-ին, մտադիր է հայտարարել, որ առաջին անգամ Ուկրաինա կուղարկի աղքատացված ուրանի արկեր՝ ռազմական օգնության նոր փաթեթի շրջանակներում։ Այս մասին հայտնում է Politico-ն՝ վկայակոչելով ամերիկացի բանիմաց պաշտոնյային։

Բայդենի վարչակազմն առաջին անգամ Ուկրաինա կուղարկի վիճահարույց աղքատացված ուրանի զինամթերք՝ որպես նոր օգնության փաթեթի մաս, որը կհայտարարվի չորեքշաբթի:

Հարկ է նշել, որ ավելի վաղ Reuters-ը հայտնել էր, որ ամերիկյան նախագահի վարչակազմն այս շաբաթ նախատեսում է առաջին անգամ հայտարարել, որ ծրագրում է Կիև տեղափոխել աղքատացված ուրանով արկեր։ Հիշեցնենք, որ սեպտեմբերի 6-ի առավոտյան Կիև է ժամանել ԱՄՆ պետքարտուղար Էնթոնի Բլինքենը։ Իր այցի ընթացքում նա հայտարարեց, որ Վաշինգթոնը 1 միլիարդ դոլար կհատկացնի Կիևին օգնելու համար՝ որպես հաջորդ օգնության մաս։