ԵՄ-ն չի ճանաչում Արցախի ընտրությունները, բայց կարևոր է համարում ԼՂ բնակչության համախմբումը դե ֆակտո ղեկավարության շուրջ

Եվրոմիությունը չի ճանաչում այսօր Ստեփանակերտում անցկացված նախագահական ընտրությունների սահմանադրական և իրավական շրջանակը։

Հայտարարությունը տարածել է Եվրոմիության արտաքին քաղաքական ծառայության խոսնակը՝ միևնույն ժամանակ ընդգծելով, որ Եվրոմիությունը կարծում է, որ Ղարաբաղի հայերի համար կարևոր է համախմբվել դե ֆակտո ղեկավարության շուրջ, որն «ի վիճակի է և ցանկանում է մասնակցել Բաքվի հետ արդյունքներին միտված քննարկումներին»:

«ԵՄ-ն հանձնառու է աջակցել այս գործընթացին»,- նշված է հայտարարությունում։

Նշենք, որ հայտարարության վերնագրում՝ որպես նորության տեղանք ԵՄ-ն գրել է Ադրբեջանը: «Ադրբեջան. մամուլի խոսնակի հայտարարությունը նախկին Լեռնային Ղարաբաղի Ինքնավար Մարզում այսպես կոչված ընտրությունների վերաբերյալ»,- գրված է վերնագրում:

Հիշեցնենք, որ Արցախի Ազգային ժողովն այսօրվա արտահերթ նիստում, գաղտնի քվեարկությամբ, Սամվել Շահրամանյանին ընտրեց Արցախի նախագահ: Ժամեր անց Բաքուն կոչ արեց միջազգային համայնքին դատապարտել Ղարաբաղի ընտրությունները: