«Քաղաքակրթությունից դուրս մղված պրովինցիալը փորձում է իր անհեթեթությամբ տպավորություն գործել մետրոպոլիայի վրա». Կարպիս Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է․ «Նորից տիրապետող է այն գավառական, քաղքենի մտայնությունը, թե Սնուփ Դոգի կամ որևէ այլ արտիստի միջոցով հնարավոր է Հայաստանը հայտնի և ճանաչելի դարձնել աշխարհում։
Տպավորություն է, թե ինչ-որ հիվանդագին ազգայնական բարդույթի հետ գործ ունենք, երբ քաղաքակրթությունից դուրս մղված պրովինցիալը փորձում է իր անհեթեթությամբ տպավորություն գործել մետրոպոլիայի վրա։
Եվ վերջապես, ի՞նչ է մեզ տալիս ինքնանպատակ ճանաչելի դառնալը։ Չեմ հավատում, թե դա կարող է տուրիստական հոսքեր ապահովել։ Ստեղծեք որակյալ ենթակառուցվածնքներ ու տուրիստները առանց դրա էլ կեռապատկվեն։
Սնուփդոգերի, քիմքարդաշյանների, Շառլ Ազնավուրի և մնացյալ կերպարների միջոցով Հայաստանը երբեք էլ չի կարող ճանաչելի դառնալ։ Հպանցիկ, ակնթարթային առնչությունը դեռևս ճանաչողություն և իմացություն չի։
Հայաստանը աշխարհին կարող է հայտնի դառնալ միայն իր ստեղծած արժեքներով, գրականությամբ, գիտությամբ և երաժշտությամբ, իր ազգային ավանդույթներն ու պատմությունը ճիշտ մատուցելով, այլ ոչ թե «մենք առաջինն ենք Քրիստոնեությունն ընդունել» արտահայտությամբ մարդկանց բանականությունը բռնաբարելով։
Հայաստանցիները կարող են նաև աշխարհին հայտնի դառնալ իրենց երկիրը պաշտպանելու կամքով և վճռականությամբ, բայց ցավոք սրտի Հայաստանի կառավարիչների երևակայությունն ու մտածողությունը իրենց սանջակից էն կողմ չի անցնում»։