Մոսկվայի հետ բանակցություններից հետո աֆրիկյան երկրները միավորվում են ռազմական դաշինքի շուրջ

«Նիգերը, Բուրկինա Ֆասոն և Մալին ստորագրել են կանոնադրություն, որը ստեղծում է Սահելի պետությունների դաշինքը (AES)՝ նպատակ ունենալով ստեղծել «կոլեկտիվ պաշտպանության և փոխօգնության ճարտարապետություն», - գրել է Մալիի անցումային նախագահ Ասիմի Գոյտան սոցիալական ցանցերում:

Փաստաթուղթն ստորագրել են Նիգերի, Բուրկինա Ֆասոյի և Մալիի ղեկավարները։ Այն նաև նախատեսում է «փոխադարձ օգնության մեխանիզմ՝ ի շահ մեր բնակչության», ասել է Գոյտան, հաղորդում է RBK-ն։ Ալյանսի ստեղծման որոշումը կայացվել է ՌԴ ՊՆ պատվիրակության և Մալիի, Բուրկինա Ֆասոյի և Նիգերի ներկայացուցիչների միջև անցկացվող բանակցությունների ֆոնին։ Սեպտեմբերի սկզբին ռուս զինվորականները՝ պաշտպանության փոխնախարար Յունուս-Բեկ Եվկուրովի գլխավորությամբ, այցելեցին Բուրկինա Ֆասո։ Պետության ղեկավար Իբրահիմ Տրաորեի հետ բանակցությունների ընթացքում քննարկվել է ռազմատեխնիկական համագործակցությունը, այդ թվում՝ Ռուսաստանում Բուրկինա Ֆասոյի զինվորականների, այդ թվում՝ օդաչուների վերապատրաստումը։

Սեպտեմբերի 16-ին Եվկուրովը փակ բանակցություններ է վարել Մալիի նախագահ Ասիմի Գոյտայի և Նիգերի պաշտպանության նախարար Սալիֆա Մոդիի հետ, հաղորդում է Մալիի հեռուստատեսությունը։

Վերջին տարիներին ռազմական հեղաշրջումներ են տեղի ունեցել Մալիում, Բուրկինա Ֆասոյում և Նիգերում: Հատուկ գումարտակի հրամանատար Գոյտան 2020 թվականին հեղաշրջում էր կազմակերպել Մալիում, իսկ բանակի նախկին կապիտան Իբրահիմ Տրաորեն նույնն արեց Բուրկինա Ֆասոյում 2022 թվականին։ Վերջին հեղաշրջումը տեղի ունեցավ Նիգերում, հուլիսին նախագահ Մուհամեդ Բազումին իշխանությունից հեռացնելու արդյունքում պետության ղեկավար դարձավ նախագահական գվարդիայի հրամանատար Աբդուրահման Չիանին։ Արևմուտքը դատապարտեց հեղաշրջումները և սկսեց սահմանափակել այդ երկրների հետ համագործակցությունը։ Արևմտյան Աֆրիկայի Պետությունների Տնտեսական Համայնքը (ECOWAS) կասեցրել է Նիգերի, Բուրկինա Ֆասոյի, Մալիի և այլ երկրների անդամակցությունը, որտեղ զինված ուժերը զավթել են իշխանությունը։

Այս բոլոր երկրներում Եվգենի Պրիգոժինի «Վագներ» ՄՌԸ-ն պահպանում էր իր ներկայությունը, այն գործում էր նաև Լիբիայում և Կենտրոնական Աֆրիկյան Հանրապետությունում: Օգոստոսին Financial Times-ը, վկայակոչելով աղբյուրներին, գրել էր, որ Տվերի մարզում ավիավթարի հետևանքով զոհված գործարար Եվգենի Պրիգոժինի բիզնես կայսրությունը «անհայտ վիճակում է»։ FT-ի զրուցակիցները նշել են, որ Ռուսաստանում հետագա գործողությունները կախված կլինեն նախագահ Վլադիմիր Պուտինից։