Ռաիսին և Պուտինը քննարկել են իրավիճակը Ղարաբաղում

Իրանի նախագահ Էբրահիմ Ռաիսին և նրա ռուս գործընկեր Վլադիմիր Պուտինը հեռախոսով մտքեր են փոխանակել Լեռնային Ղարաբաղի շուրջ ստեղծված իրավիճակի և Ադրբեջանի և Հայաստանի միջև հարաբերությունների կարգավորման հարցի շուրջ։

«Մտքերի հանգամանալից փոխանակում է տեղի ունեցել Լեռնային Ղարաբաղի շուրջ ստեղծված իրավիճակի և Ադրբեջանի և Հայաստանի միջև հարաբերությունների կարգավորման հարցի շուրջ»,- ասվում է Կրեմլի հաղորդագրության մեջ։

Ինչպես նշվում է, ՌԴ ղեկավարը տեղեկացրել է ռուսական խաղաղապահ զորախմբի գործունեության մասին, այդ թվում՝ խաղաղ բնակչությանը մարդասիրական օգնության տրամադրման, Լեռնային Ղարաբաղի հայ բնակչության իրավունքների և անվտանգության պաշտպանության մասին։

Նշվում է, որ Ռուսաստանի և Իրանի նախագահները «ընդգծել են բոլոր հարցերը բացառապես խաղաղ, քաղաքական և դիվանագիտական ​​միջոցներով լուծելու կարևորությունը»։

Պուտինն ու Ռաիսին աջակցել են 3+3 հարթակի ակտիվացմանը. «Երկկողմ շահագրգռվածություն է արտահայտվել «3+3» խորհրդատվական տարածաշրջանային պլատֆորմի (Ադրբեջան, Հայաստան, Վրաստան, Ռուսաստան, Իրան և Թուրքիա) աշխատանքների ակտիվացման ուղղությամբ»,- ասված է իրանական կողմի մամուլի ծառայության հաղորդագրության մեջ։

Զրույցը տեղի է ունեցել իրանական կողմի նախաձեռնությամբ։