«Սխալ էր արաբական երկրների և Իսրայելի հարաբերությունների կարգավորումը». Իրանի արտգործնախարար

Արաբական երկրները, որոնք միացել են Աբրահամի համաձայնագրին և կարգավորել հարաբերությունները Իսրայելի հետ, սխալ են թույլ տվել, նման կարծիք է հայտնել Իրանի արտաքին գործերի նախարարության պաշտոնական ներկայացուցիչ Նասեր Կանանի Չաֆին՝ ելույթ ունենալով Թեհրանում կայացած մամուլի ասուլիսում։ «Մենք բազմիցս հայտարարել ենք, որ Սիոնիստական ​​ռեժիմի հետ հարաբերությունների կարգավորումը չի նպաստում տարածաշրջանում կայունության և անվտանգության ամրապնդմանը: Ակնհայտ է, որ այն երկրները, որոնք հարաբերությունների կարգավորումն են տեսել՝ որպես Պաղեստինի նկատմամբ սիոնիստական ռեժիմի հանցագործությունների կանխում, սխալվել են»,- ասել է նա։

2020 թվականի սեպտեմբերին Վաշինգթոնում իսրայելական կողմը ԱՄՆ-ի միջնորդությամբ փաստաթղթեր է ստորագրել ԱՄԷ-ի և Բահրեյնի հետ հարաբերությունների կարգավորման վերաբերյալ։ Եռակողմ գործարքը կոչվում էր Աբրահամի համաձայնագիր: Այնուհետև Սուդանը և Մարոկկոն հայտարարեցին հրեական պետության հետ հարաբերությունների կարգավորման մասին։ Մինչ ԱՄԷ-ի և Բահրեյնի հետ խաղաղությունը, Իսրայելը արաբական երկրներից դիվանագիտական ​​հարաբերություններ ուներ միայն Եգիպտոսի և Հորդանանի հետ։