«Առաջիկա ժամերին ու օրերին արաբական և իսլամական երկրներն ավելի համակարգված դիրքորոշում կընդունեն». Աբդոլլահյան

Այս պատերազմը շարունակելու որևէ սխալ հաշվարկ, Գազայի և Հորդանանի արևմտյան ափի բնակիչների բռնի տեղահանումը ու ցեղասպանումը կարող են լուրջ հետևանքներ ունենալ տարածաշրջանում, ասել է Իրանի ԱԳ նախարարը՝ կիրակի օրը Հարավային Աֆրիկայի արտգործնախարար Գրեյս Նալեդի Մանդիսա Պանդորի հետ համատեղ ասուլիսի ժամանակ։

«Այսօր տարածաշրջանը նման է վառոդի տակառի»,- ընդգծել է Հոսեյն Ամիր Աբդոլլահյանը։

«Ես կցանկանայի զգուշացնել ԱՄՆ-ին և նրա վստահված անձին՝ կեղծ իսրայելական ռեժիմին, որ եթե նրանք անհապաղ չդադարեցնեն մարդկության դեմ հանցագործությունները և ցեղասպանությունը Գազայում, տարածաշրջանը դուրս կգա վերահսկողությունից»,- ասել է նա՝ հավելելով, որ Իսրայելը այս պատերազմը մղում է ճնշված ազգի և պաղեստինցի խաղաղ բնակիչների դեմ՝ հանուն Միացյալ Նահանգների:

Անդրադառնալով ԱՄՆ նախագահ Ջո Բայդենի՝ Թել Ավիվ այցին, նա ասել է, որ Բայդենը պաշտոնապես հայտարարել է, որ հարյուրավոր ինքնաթիռներով, նավերով և բեռնատարներով զենքեր կուղարկի ի պաշտպանություն Գազայում Իսրայելի կողմից իրականացվող սպանություններին և ջարդերին:

Նա նաև բարձր է գնահատել ՄԱԿ-ի գլխավոր քարտուղար Անտոնիո Գուտերեշի ջանքերը՝ հումանիտար օգնություն ուղարկելու և Գազայում խաղաղ բնակիչների սպանությունը կանխելու ուղղությամբ։

Իրանցի դիվանագետի խոսքով, առաջիկա ժամերին ու օրերին արաբական և իսլամական երկրներն ավելի համակարգված դիրքորոշում կընդունեն տարածաշրջանում իսրայելական այս ռազմական հանցագործությանը դիմակայելու հարցում։