«Ուկրաինան չի հաղթի մարտի դաշտում»․ Վիկտոր Օրբան

Հունգարիայի վարչապետ Վիկտոր Օրբանը հայտարարել է, որ Ուկրաինան մարտի դաշտում հաղթանակ չի տանի, ուստի Եվրոմիությունը պետք է փոխի իր ռազմավարությունը և պատրաստի «պլան Բ», հաղորդում է Reuters-ը: Հունգարիայի պետական ռադիոյին տված հարցազրույցում Օրբանն ասել է, որ այն ռազմավարությունը, որին ԵՄ-ն հավատարիմ էր Ուկրաինայում պատերազմի հարցում, ձախողվել է։
«Այսօր բոլորը գիտեն, բայց չեն համարձակվում այդ մասին բարձրաձայն ասել, որ այդ ռազմավարությունը ձախողվել է։ Ակնհայտ է, որ դա չի աշխատի: Ուկրաինացիները չեն հաղթի մարտի դաշտում։ Պետք է պլան Բ։ Իսկ առայժմ պատճառ չկա, որ հունգարացի հարկատուները գումարներ ծախսեն Ուկրաինայի համար»,- ասել է Օրբանը։
Բյուջետային ճշգրտման շրջանակներում, ինչպես հիշեցնում է Reuters-ը, ԵՄ իշխանությունները անդամ երկրներին առաջարկել են լրացուցիչ ներդրումներ կատարել Ուկրաինային 50 մլրդ եվրոյի օգնություն տրամադրելու համար։