Լիբանանի հարավում գտնվող` ՄԱԿ-ի խաղաղապահ ուժերի շտաբի վրա արկ է ընկել

Հրթիռը հարվածել է Լիբանանի հարավում գտնվող՝ ՄԱԿ-ի խաղաղապահ ուժերի (UNIFIL) շտաբի շենքին, տուժածներ չկան, ասվում է առաքելության հաղորդագրությունում:
«Հարավային Լիբանանի Նակուրա քաղաքում ՅՈՒՆԻՖԻԼ-ի շտաբը խոցվել է արկից: Բարեբախտաբար, այն չի պայթել և ոչ ոք չի տուժել, սակայն շտաբի շենքը վնասվել է: Մենք ջանքեր ենք գործադրում հարձակման աղբյուրը պարզելու համար»,- նշվում է հաղորդագրությունում:
Առաքելությունը նշել է, որ սա առաջին դեպքը չէ, երբ արկը հարվածում է իր շտաբին հարավային Լիբանանում Իսրայելի և Հեզբոլլահի զինյալների առճակատման հետևանքով, վերջին երեք շաբաթվա ընթացքում առաքելության բազմաթիվ այլ օբյեկտներ վնասվել են:
«Սա վառ հիշեցում է փխրուն, լարված և խիստ անկայուն միջավայրի մասին, որտեղ ներկայումս գործում են խաղաղապահները: Մենք բոլոր կողմերին կոչ ենք անում անհապաղ դադարեցնել կրակը: Մենք նաև կոչ ենք անում ընթացող հակամարտության բոլոր կողմերին դադարեցնել ցանկացած գործողություն, որը վտանգում է երկրի անվտանգությունը»,- նշվում է զեկույցում։
Առաքելությունն ընդգծել է, որ չնայած հարձակումներին, խաղաղապահները մնում են իրենց դիրքերում և ակտիվորեն աշխատում են Լիբանանն ու Իսրայելը բաժանող Կապույտ գծի երկու կողմի ներկայացուցիչների հետ՝ լարվածությունը նվազեցնելու և թյուրիմացություններից խուսափելու համար։