Եմենը հայտարարել է, որ միանում է պատերազմին

Եմենական շարժման խոսնակ Յահյա Սարիան ասել է, որ հութիներն անօդաչու թռչող սարքերով, բալիստիկ և թևավոր հրթիռներով հարվածել են Իսրայելի ուղղությամբ:

«Մեր զինված ուժերը բալիստիկ և թևավոր հրթիռների, ինչպես նաև մեծ թվով անօդաչու թռչող սարքերի մեծ խմբաքանակ են արձակել Իսրայելի կողմից օկուպացված տարածքներում տեղակայված հակառակորդի տարբեր թիրախների ուղղությամբ»,- ասել է «Անսար Ալլահ» շարժման ներկայացուցիչը, մեջբերում է ՏԱՍՍ-ը։

Սարիան նաև ասել է, որ հութիները «կշարունակեն ավելի ուժգին հարվածներ հասցնել մինչև Իսրայելի ագրեսիան դադարեցվի»։

Միևնույն ժամանակ, ինչպես ասել է հութիների բրիգադային գեներալ Բին Ամեր Ալ Մայադինը, եմենցիների որոշումը՝ ՀԱՄԱՍ-ի և Իսրայելի միջև հակամարտության մեջ մտնելու՝ «հավասարակշռված էր և արտացոլում էր Եմենի ժողովրդի կամքը»:

Բին Ամերն ընդգծել է իր մտադրությունների լրջությունը. «Թշնամին պետք է գիտակցի, որ հակամարտությունը կընդլայնվի այնքան ժամանակ, քանի դեռ շարունակվում է Պաղեստինի ժողովրդի ջարդը։ Մեր հրթիռները կգերազանցեն ամերիկյան և իսրայելական համակարգերին։ Երբ մտանք այս պատերազմի մեջ, նախապես պատասխան էինք ակնկալում։ Ուստի մենք պատրաստ ենք սրան, մեր գործողությունները համակարգում ենք դիմադրության առանցքի ուժերի հետ»։