«Կապանում ձերբակալվածի հայրը պարեկների աչքի առաջ չի մահացել». ՆԳ փոխնախարար

ՆԳ փոխնախարար Արփինե Սարգսյանը լրագրողների ետ ճեպազրույցում անդրադարձել է օրեր առաջ Կապանում տեղի ունեցած դեպքին. «Ըստ էության, պարեկները ձերբակալել են քաղաքացուն իրավաչափ նպատակներով, այնուհետև հայրն է մոտեցել պարեկներին, ասել են, թե ինչու են ձերբակալում, հետո տղային ներկայացրել են բաժին, հայրը բարձրացել է վերև, հետո բաժնում քաղաքացին տեղեկացել է, որ տանը հայրը մահացել է։ Ներքին անվտանգության և հակակոռուպցիոն վարչությունում դեպքի մանրամասներն ուսումնասիրվել են, այդ թվում՝ պարեկներին ամրակցված կրծքի տեսախցիկների տեսաձայնագրությունները, և որևէ խախտում չի արձանագրվել պարեկների կողմից։ Այն թյուր տեղեկատվությունը, որ պարեկների աչքի առաջ է տեղի ունեցել մահը, և նրանք որևէ միջամտություն չեն ցուցաբերել, նման իրավիճակ չկա։ Ասացի արդեն, որ քաղաքացին բաժնում է տեղեկացել, որ հայրը տանը մահացել է»,- ասել է Սարգսյանը: