Հինգշաբթի, 25 ապրիլի, 2024 թ.
|
Ստեփանակերտում`   +12 °C

Գազայի բնակիչները վերադառնում են իրենց տները՝ չնայած զանգվածային ավերածություններին

Գազայի բնակիչները վերադառնում են իրենց տները՝ չնայած զանգվածային ավերածություններին
1012
Չորեքշաբթի, 29 նոյեմբերի, 2023 թ., 22:12

Գազայի հատվածի Խան Յունիս քաղաքի բնակիչները վերադառնում են իրենց տները՝ չնայած զանգվածային ավերածություններին և կյանքի համար անհրաժեշտ պայմանների բացակայությանը։ Այս մասին հայտնում է «ՌԻԱ Նովոստի»-ի թղթակիցը։ Խան Յունիս քաղաքը ռազմական գործողության մեկնարկից ի վեր (հոկտեմբերի 7) Իսրայելի կողմից ենթարկվել է զանգվածային ռմբակոծությունների: Որոշ թաղամասեր ամբողջությամբ ավերվել են։ Շենքերում, որոնց մի մասը մասամբ վնասվել է, բացակայում են էլեկտրաէներգիան և ջրամատակարարումը:
«Պատերազմի սկզբում մենք լքեցինք մեր տները։ Հրադադարի՝ ուժի մեջ մտնելուց հետո մենք վերադարձել ենք և տեսնում ենք այս սարսափը։ Մեր թաղամասում կյանքի համար ոչ մի պայման չկա»,- գործակալությանն ասել է Նաբիլ քաղաքի բնակիչ Աբու Տոեմին։ Որոշ ընտանիքներ նախընտրել են հրադադարի օրերին ապրել իրենց տների ավերակներում։ Մարդիկ ստիպված են փողոցում խարույկի վրա ուտելիք պատրաստել։
Երկուշաբթի ՀԱՄԱՍ-ը և Իսրայելը Կատարի և Եգիպտոսի միջնորդությամբ պայմանավորվել են քառօրյա հումանիտար հրադադարը ևս երկու օրով երկարաձգելու շուրջ։ Այսպիսով, հրադադարը գործում է մինչև նոյեմբերի 30-ի առավոտ: ԶԼՄ-ները գրում են, որ Եգիպտոսը, Կատարը, ԱՄՆ-ն և Իսրայելը քննարկում են հրադադարը շարունակելու հնարավորությունը: