Նոտր Դամը համալրված կլինի հրդեհային անվտանգության աննախադեպ համակարգով

Փարիզի Աստվածամոր տաճարում, որն այրվել էր 2019 թվականին խոշոր հրդեհի հետևանքով, հրդեհային անվտանգության աննախադեպ համակարգ կտեղադրվի, ասել է տաճարի վերակառուցման ղեկավար Ֆիլիպ Ժոստը։
«Բոլոր նախազգուշական միջոցները ձեռնարկվել են հրդեհից ամբողջական պաշտպանություն ապահովելու համար: Ծխի դետեկտորային համակարգ կտեղադրվի աշտարակի և մանսարդի մակարդակում՝ ցանկացած հրդեհ կանխելու համար, որն իր տեսակի մեջ առաջինն է, որ տեղադրվել է Ֆրանսիայի տաճարում»,- ասել է Ժոստը Ֆրանսիայի Ազգային ժողովի մշակութային հարցերի հանձնաժողովի նիստի ժամանակ։ Նա նաև ասել է, որ տաճարը բացվելուց հետո տարեկան կկարողանա ընդունել 14 միլիոն այցելու՝ երկու միլիոնով ավելի, քան հրդեհից առաջ։
Նախկինում լրատվամիջոցները հայտնել էին, որ Աստվածամոր տաճարի հրդեհային պաշտպանության համակարգի արժեքը կկազմի 2 մլն եվրո։ Այն, ի թիվս այլ բաների, կներառի 625 խմ ջրի համար նախատեսված ռեզերվուար։ Մայր տաճարում ավելի քան մեկ կիլոմետր խողովակներ են անցկացվում ժամում մոտ 600 հազար լիտր ջուր մատակարարելու համար։
Նոտր Դամի տաճարի պատմության մեջ ամենախոշոր հրդեհը տեղի է ունեցել 2019 թվականի ապրիլի 15-ին։ Տաճարի աշտարակը փլուզվել է, կրող կառույցները՝ այրվել։ Հրդեհը ոչնչացրել է տանիքի յուրահատուկ փայտե շրջանակը՝ բաղկացած կաղնե ութհարյուրամյա հեծաններից, որոնցից յուրաքանչյուրը պատրաստված է եղել մեկ ծառի բնից: Հրշեջները հայտնել են, որ Աստվածամոր տաճարի կառուցվածքը և տաճարի գլխավոր մասունքները անվնաս են մնացել:
Ավելի վաղ Ֆրանսիայի նախագահ Էմանուել Մակրոնը հայտարարել էր, որ տաճարի բացումը տեղի կունենա 2024 թվականի դեկտեմբերի 8-ին։