«Ռուսաստանը չի հրաժարվի ինքնիշխանությունից երշիկի դիմաց». Պուտին

Ռուսաստանը չի հրաժարվի իր ինքնիշխանությունից «երշիկի դիմաց», հայտարարել է նախագահ Վլադիմիր Պուտինը «Եդինայա Ռոսիայի» համագումարում, փոխանցում է РБК-ի թղթակիցը։

«Ռուսաստանը, ինչպես նաև որոշ երկրներ, չի կարող հրաժարվել իր ինքնիշխանությունից՝ երշիկի դիմաց և դառնալ ինչ-որ մեկի արբանյակը։ Ռուսաստանը պետք է ինքնիշխան լինի, այլապես չի լինի»,- ասել է Պուտինը։

Իր ելույթում նա շնորհակալություն է հայտնել «Եդինայա Ռոսիա»-ին «հետևողական և վստահելի աջակցության» համար. հիշեցնենք, որ կուսակցությունը միաձայն պաշտպանել է նախագահական ընտրություններում նրա ինքնառաջադրմանը՝ որպես թեկնածու։
«Միասին մենք դեռ շատ անելիքներ ունենք՝ ի շահ Ռուսաստանի։ Առանց չափազանցության, մենք կանգնած ենք պատմական խնդիրների առաջ»,- նշել է նախագահը՝ չթվարկելով դրանք։

Պուտինը մրցակցությունն ու «գաղափարների ազնիվ քննարկումն» անվանել է երկրի դինամիկ զարգացման բանալին։ «Բայց, չնայած բոլոր տեսակետների տարբերությանը, քաղաքական ուժերը պետք է հիշեն, որ մեզ համար գլխավորը մեր երկրի՝ ուժեղ լինելու ճիշտ և կենսական անհրաժեշտությունն է։ Սա նշանակում է, որ երկրորդական բաները պետք է մի կողմ դնենք, առանց դրսից հուշելու որոշումներ կկայացնենք»,- ասել է նա։
ՌԴ նախագահի խոսքով, Արևմուտքը, «ագրեսիա սանձազերծելով» Ռուսաստանի դեմ, հույս ուներ «քանդել քաղաքական համակարգը և խառնաշփոթ սերմանել»։ Նման մեթոդները, նրա խոսքով, փորձարկվել են «գունավոր հեղափոխությունների» ժամանակ այլ երկրներում, իսկ Ռուսաստանում՝ «ազատ, ինքնիշխան պետությունում», «նման բաղադրատոմսերը չեն աշխատի»,- համոզված է նա։