«Հրազդանի կիրճ տանող ճանապարհը փակ է լինելու մեքենաների համար, որ մարդիկ մարզվեն». Իզաբելլա Աբգարյան

Երևանի ավագանու անդամ Իզաբելլա Աբգարյանը ֆեյսբուքյան իր էջում գրել է. «Իսկ դուք գիտե՞իք, որ դրսում մարզվելու սեզոնը բացվում է ձմռանը՝ հենց ձյուն գա: Ըստ Երևանի քաղաքապետարանի հերթական՝ իրականությունից կտրված որոշման, Հրազդանի կիրճ տանող ճանապարհը շաբաթ-կիրակի փակ է լինելու մեքենաների համար, որ մարդիկ մարզվեն:
Մյուս կողմից էլ մեքենաները ձմռանը շատ արագ վարելու պայմաններ ունեն, ինչը խցանումները պակասեցնում է:
Բռնես ու ձմռանը բեռնաթափող այլընտրանքային ճանապարհը երկու օր փակ պահես, որ մարզվե՞ն:
Առհասարակ, ինձ թվում է՝ որոշում կայացնողներն իրենց կաբինետից այնկողմ չեն տեսնում:
Այլապես ոնց բացատրես մեկ այլ որոշումը՝ հանրապետության գլխավոր տոնածառի լույսերը վառել աշխատանքային օրով՝ երեքշաբթի, ժամը 19:30:
Լավ, դուք, պարոնայք, քաղաքապետարանից ոտքով կհասնեք արարողությանը: Բա ի՞նչ անեն աշխատող ծնողները, որ 18:00-ին են վերջացնում աշխատանքը ու պիտի այդ՝ խայտառակ խցանման ժամին հասնեն տուն, երեխաներին վերցնեն ու, նորից խցանման մեջ ընկնելով, բերեն հրապարակ:
Առավել ևս, որ հրապարակը փակելու եք, ինչն էլ ավելի կվատթարացնի երթևեկությունը:
Բա մարզերի երեխանե՞րը: Չէ՞ր լինի հանգստյան օր անել, որ նրանց էլ ծնողները կարողանային բերել Երևան: Չէ՞ որ դա ՀԱՆՐԱՊԵՏՈՒԹՅԱՆ ԳԼԽԱՎՈՐ ՏՈՆԱԾԱՌՆ Է:
Ո՞նց եք անում, որ ձեր մոտ որոշում ընդունելիս բացակայում են գլխավոր շահառուները. երեխաները, աշխատող ծնողները, մարզվողները, վարորդները»: