ՄԱԿ-ը մեղադրում է Ռուսաստանին

Ռուսաստանին «չհաջողվեց համարժեք միջոցներ ձեռնարկել Ուկրաինայում խաղաղ բնակիչներին պաշտպանելու համար», և կան նշաններ, որ ռուսական զորքերը ռազմական հանցագործություններ են կատարել, ասել է ՄԱԿ-ի մարդու իրավունքների գերագույն հանձնակատար Ֆոլքեր Թըրքը:
Reuters-ը հայտնում է, որ Գերագույն հանձնակատարի գրասենյակը հայտնաբերել է «մարդու հիմնարար իրավունքների կոպիտ խախտումներ, միջազգային մարդասիրական իրավունքի լուրջ խախտումներ և ռազմական հանցագործություններ, առաջին հերթին Ռուսաստանի Դաշնության կողմից»։

Խախտումները ներառում են 142 խաղաղ բնակիչների մահապատիժներ այն պահից, երբ Ռուսաստանը ներխուժեց Ուկրաինա անցյալ փետրվարին, ինչպես նաև առևանգումներ, խոշտանգումներ և դաժան վերաբերմունք կալանավորների նկատմամբ, ներառյալ սեռական բռնությունը, Ժնևում Մարդու իրավունքների խորհրդին ասել է Թըրքը:

«Ռուսաստանի Դաշնությունը համարժեք միջոցներ չի ձեռնարկել քաղաքացիական անձանց և քաղաքացիական օբյեկտներն իրենց հարձակումների հետևանքներից պաշտպանելու համար»,- ասել է Թըրքը:

Նրա խոսքով, երկու երկրների, հատկապես Ռուսաստանի զինված ուժերը պետք է հարգեն մարդու իրավունքները և մարդասիրական իրավունքը։

«Նրանք պետք է դադարեցնեն մեծ տարածք ընդգրկող պայթուցիկ զենքի օգտագործումը բնակեցված վայրերում և կազմեն ականների տեղակայման մանրամասն քարտեզ», - ասել է Թըրքը:

Ի պատասխան՝ ՄԱԿ-ում Ռուսաստանի մշտական ​​ներկայացուցչությունը մեղադրել է ՄԱԿ-ի Մարդու իրավունքների գերագույն հանձնակատարի գրասենյակին ուկրաինացի զինվորականների կողմից իբր կատարված հանցագործությունների «մաքրման» համար։