Զելենսկին երկիրը լքած տղամարդկանց կոչ է արել վերադառնալ

Ուկրաինայի նախագահ Վլադիմիր Զելենսկին Տալլինում Էստոնիայի վարչապետ Կայա Կալլասի հետ համատեղ մամուլի ասուլիսում ասել է, որ ռուսական ագրեսիայի դեմ պայքարելու և տնտեսությանն աջակցելու համար իր երկրին անհրաժեշտ են զինվորական տարիքի ուկրաինացիներ, ովքեր մեկնել են արտերկիր։ «Մենք տեսնում ենք, որ կան մարդիկ, ովքեր խախտել են Ուկրաինայի օրենքները և մեկնել արտերկիր։ Եթե ​​այդ մարդիկ զինվորական տարիքի են, ուրեմն պետք է լինեն Ուկրաինայում և օգնեն Ուկրաինային։ Ես չեմ խոսում այն ​​մասին, թե ով է հիմա ռազմաճակատում կամ ով չէ, մենք ունենք համապատասխան օրենք. բայց սա էթիկայի և բարոյականության հարց է»,- ասել է Զելենսկին։

Նա նշել է, որ ռազմաճակատում կռվող մեկ զինվորի համար անհրաժեշտ է 6-8 հարկատուի գումար։

«Եթե դու Ուկրաինայում ես, նույնիսկ եթե առաջին գծում չես, եթե աշխատում ես և հարկեր ես վճարում, ուրեմն դու նաև ներդրում ես անում ու պաշտպանում ես երկիրը։ Բայց եթե զինվորական տարիքի ես և գտնվում ես արտերկրում, Ուկրաինայում հարկեր չես վճարում և ապօրինի լքել ես երկիրը, ապա հարցեր են ծագում»,- նշել է Ուկրաինայի նախագահը։

«Եթե մենք ուզում ենք փրկել Ուկրաինան և Եվրոպան, ապա մենք բոլորս պետք է մտածենք, թե ինչպես օգնել Ուկրաինային։ Մենք կարող ենք լինել մարտի դաշտի քաղաքացիներ կամ աշխատող և հարկ վճարող քաղաքացիներ։ Հակառակ դեպքում՝ չկա փող բանակի համար, ուրեմն և չի մնա մեկը, ով կկարողանար պաշտպանել Ուկրաինան»,- ասել է Ուկրաինայի նախագահը։