«Փաշինյանին հիշեցնում եմ». Հայկ Դեմոյան

Պատմական գիտությունների դոկտոր Հայկ Դեմոյանի ֆեյսբուքյան գրառումը. «ՀԻՇԵՑՈՒՄ
Սույնով Նիկոլ Փաշինյանին հիշեցնում եմ, որ ՀՀ Կրթության, գիտության, մշակույթի և սպորտի նախարար Ժաննա Անդրեասյանի հետ 2023թ. դեկտեմբերի 13- ին կայացած հանդիպման ժամանակ նախարարը հանձնարարել էր «Մասնակցային դպրոց» ՀԿ-ի տնօրեն Վահրամ Սողոմոնյանին և 7-րդ դասարանի Հայոց պատմության դասագրքի հեղինակ Սմբատ Հովհաննիսյանին կազմել և հրապարակել սխալների ու վրիպակների այն ցանկը, որոնք, ըստ դասագրքի հեղինակի, ընդունելի են համարվել շուրջ 60 էջ ծավալով գրախոսականից, որը կցվել էր 19 պատմաբան-մասնագետների ստորագրությամբ 2023թ. դեկտեմբերի 4-ին շրջանառված մասնագիտական եզրակացությանը:
Առ այսօր ԿԳՄՍ նախարարությունը չի հրապարակել ԿԳՄՍ նախարար Ժաննա Անդրեասյանի ձևակերպմամբ՝ դասագրքի վերաբերյալ «անկախ մասնագիտական» խմբի կարծիքն ու այդպիսի կարծիք կազմելու համար ընտրված անձանց անունները:
Այսպիսի մոտեցումն ու գործելաոճը համարում ենք անընդունելի և պահանջում ենք հրապարակել խոստացված կարծիքը, եթե այն կազմվել է, կամ տալ սպառիչ հիմնավորումներ, թե ինչու նախարար Ժ. Անդրեասյանի այս հանձնարարականը չի կատարվել:
Այս պահին արձանագրենք, որ դասագրքի և դրանում առկա բացահայտ թերությունների շուրջ առկա է հանրային լուրջ դժգոհություն, որը նորանոր դրսևորումներ է ստանում: Մեր խնդիրը այն է, որ այս հիմնախնդրի շուրջ քննարկումներն ու որոշումները խստորեն պահվեն գիտական քննարկման ու էթիկայի սահմաններում՝ այդ թվում կայացրած որոշումների կատարմանը հետամուտ լինելու դրվագով»: