Ադրբեջանն արձագանքել է Փաշինյանի առաջարկներին

Ադրբեջանի արտաքին քաղաքական հարցերով գերատեսչությունից արձագանքել են Նիկոլ Փաշինյանի՝ սպառազինությունների վերահսկման և չհարձակման պայմանագրի վերաբերյալ առաջարկին։

Ադրբեջանի ԱԳՆ մամուլի ծառայության հաղորդագրության մեջ ասվում է, թե նշված համաձայնագրի նախագծի քննարկման հենց սկզբից կոչ են արել հայկական կողմին «վերջ դնել Ադրբեջանի տարածքային ամբողջականության և ինքնիշխանության դեմ շարունակվող պահանջներին», սակայն, Հայաստանն, իբր, գործնական քայլեր չի ձեռնարկել այդ ուղղությամբ»։
«Այս ուղղությամբ, հայկական կողմից միջոցներ ձեռնարկելու փոխարեն գործնական նշանակություն չունեցող առաջարկներ հնչեցնելը թյուրիմացություն է ստեղծում և անընդունելի է: Հաշվի առնելով վերը նշվածը, ինչպես նաև այն, որ, ինչպես հայտարարեց վարչապետ Փաշինյանը, իր երկիրը վարում է ռազմականացման լուրջ քաղաքականություն, վերջին տարիներին կնքվել են պայմանագրեր մի քանի միլիարդ դոլարի զենքի մատակարարման, ռազմական արդյունաբերության զարգացման համար, Հայաստանի այն պնդումը, թե լրջորեն են վերաբերվում խաղաղության գործընթացին, «քաղաքական շահարկում է»,- ասված է հաղորդագրության մեջ:

Պաշտոնական Բաքվում կարծում են, թե նման «կողմնակալ հայտարարությունները» խոչընդոտում են տարածաշրջանում հետագա զարգացմանը և առաջընթացին՝ հիմնված միջազգային իրավունքի նորմերի և սկզբունքների հարգման վրա»:

«Ադրբեջանը շարունակելու է իր ջանքերը և Հայաստանից համարժեք քայլեր է ակնկալում ոչ թե խոսքով, այլ գործով»,- հավելել են Ադրբեջանի ԱԳՆ-ից: