Երկուշաբթի, 25 օգոստոսի, 2025 թ.
|
Ստեփանակերտում`   +31 °C

Ֆինլանդիան թույլ է տվել իր զենքով հարվածել Ռուսաստանին

Ֆինլանդիան թույլ է տվել իր զենքով հարվածել Ռուսաստանին
1783
Ուրբաթ, 01 մարտի, 2024 թ., 00:00

Ֆինլանդիան որևէ սահմանափակում չի դնում Կիևին տրամադրած ռազմական օգնության կիրառության հարցում, և Ուկրաինան դրանք կարող է օգտագործել նաև Ռուսաստանի տարածքում, գրում է ֆիննական Yle թերթը՝ վկայակոչելով խորհրդարանի պաշտպանության հանձնաժողովի և երկրի պաշտպանության նախարարության ղեկավարությանը։
Ինչպես նշվում է հրապարակված հոդվածում, պաշտպանության նախարարությունը Yle-ին հայտնել է, որ Ֆինլանդիան որևէ սահմանափակում չի սահմանել Ուկրաինա ուղարկվող սարքավորումների օգտագործման համար։ Ֆինլանդիան հրապարակայնորեն չի ասում, թե ինչ զենք է փոխանցել Ուկրաինա։

Հաղորդվում է, որ Ֆինլանդիայի պաշտպանության նախարար Անտի Հաքանենը հայտարարել է, որ զենքի կիրառման սահմանափակումները հիմնականում սահմանում են այն երկրները, որոնք Ուկրաինային հեռահար զենքի համակարգեր են տրամադրել։ Նախարարը հավելել է, որ Ֆինլանդիան իր դաշնակիցների հետ մշտապես քննարկում է զենքի տեսքով Ուկրաինային հասցվող օգնության սահմանափակումները։

Ֆինլանդիայի խորհրդարանի պաշտպանության հանձնաժողովի նախագահ Յուկկա Կոպրան նույնպես հաստատել է, որ Հելսինկին Կիևի վրա զենքի կիրառման սահմանափակումներ չի սահմանել, և «Ուկրաինան պետք է իրավունք ունենա օգտագործել այդ զենքերը Ռուսաստանի տարածքում գտնվող ռազմական թիրախների դեմ»։ Միևնույն ժամանակ, Կոպրայի տեղակալ, պատգամավոր Միկո Սավոլան նշել է, որ Ֆինլանդիայի կողմից Ուկրաինային տրամադրվող զենքի շառավիղը կարճ է։

ՆԱՏՕ-ի գլխավոր քարտուղար Յենս Սթոլթենբերգն ավելի վաղ Ռուսաստանի լայնածավալ ներխուժման սկզբից ի վեր առաջին անգամ հայտարարել էր, որ Ուկրաինան իրավունք ունի հարվածել «ռուսական ռազմական օբյեկտներին Ուկրաինայի սահմաններից դուրս»՝ միջազգային իրավունքի համաձայն։