Apple-ը տուգանվել է գրեթե 2 միլիարդ դոլարով

Եվրոհանձնաժողովը տուգանել է Apple-ին 1,8 միլիարդ եվրոյով, քանի որ ընկերությունն արգելել է երաժշտական ​​հավելվածների մշակողներին տեղեկացնել օգտատերերին App Store-ից դուրս վճարման այլ եղանակների մասին, հայտնում է Bloomberg-ը։
Հետաքննության պատճառ է դարձել շվեդական Spotify երաժշտական ​​սթրիմինգ ծառայության բողոքը։ Եվրոհանձնաժողովը պարզել է, որ Apple-ը խախտել է ԵՄ հակամենաշնորհային կանոնները և ընկերությանը պատվիրել է հանել դրույթները, որոնք արգելում են ծրագրավորողներին տեղեկացնել օգտատերերին Apple-ի էկոհամակարգից դուրս ավելի էժան ծառայությունների մասին:
«Apple-ի՝ վերջին մոտ մեկ տասնամյակի վարքագիծը, հնարավոր է, հանգեցրել է նրան, որ iOS-ի շատ օգտատերեր զգալիորեն ավելի բարձր գներ են վճարում երաժշտության հոսքային բաժանորդագրությունների համար»,- ասվում է հանձնաժողովի հայտարարության մեջ:
Apple-ն արձագանքել է՝ ասելով, որ Եվրոհանձնաժողովը չի կարող գտնել սպառողներին վնաս պատճառելու որևէ հավաստի ապացույց և «անտեսում է ծաղկող, մրցակցային և արագ աճող շուկայի իրողությունները», և որ Spotify-ի հաջողությունը մեծապես պայմանավորված է App Store-ով:
«Այսօր Spotify-ին է պատկանում երաժշտական ​​հոսքերի եվրոպական շուկայի 56%-ը, ինչն ավելի քան երկու անգամ ավելի է, քան իր ամենամոտ մրցակցինը, և ոչինչ չի վճարում Apple-ին այն ծառայությունների համար, որոնք օգնել են նրան դարձնել աշխարհի ամենաճանաչված բրենդներից մեկը»,- ​​ասվում է Apple-ի հայտարարությունում:
Apple-ի հակամենաշնորհային գործն սկսվել է Spotify-ի բողոքով 2019թ.: Շվեդական ընկերությունը մեղադրել է Apple-ին, որին պատկանում է iOS սարքերի օգտատերերի համար նախատեսված հավելվածների բացառիկ խանութը, իր պայմանները երրորդ կողմի մշակողներին պարտադրելու համար: Դատավարության ընթացքում Spotify-ի ներկայացուցիչները, ըստ Apple-ի, ավելի քան 65 անգամ հանդիպել են Եվրոհանձնաժողովի հետ։
Bloomberg-ը նշում է, որ Apple-ը տուգանք է ստացել «Թվային շուկաների մասին» օրենքի ուժի մեջ մտնելուց անմիջապես առաջ, որն ազդեցիկ ընկերություններին արգելելու է նախապատվություն տալ սեփական ծառայություններին և դրանք վեր դասել մրցակիցների ծառայություններից»։