Պակիստանցի ուսանողը մահապատժի է դատապարտվել WhatsApp-ով ուղարկված հաղորդագրությունների համար

Պակիստանի հյուսիս-արևելքում գտնվող Փենջաբ նահանգի դատարանը մահապատժի է դատապարտել 22-ամյա ուսանողին, հայտնում է BBC-ն։

Հաղորդագրության համաձայն՝ նրան մեղադրել են սրբապղծության մեջ՝ WhatsApp-ի հաղորդագրությունների պատճառով։ Դատարանը եզրակացրել է, որ ուսանողն օգտագործել է մեսենջերը՝ Մուհամեդ մարգարեին և նրա կանանց վիրավորող լուսանկարներ և տեսանյութեր ուղարկելու համար: Ուսանողի հասցեին բողոքել է տեղի բնակիչներից մեկը դեռ 2022 թվականին, ով ասել է, որ իրեն «անպարկեշտ նյութեր» են ուղարկել WhatsApp-ով:

Ավելի վաղ նույն գործով ցմահ ազատազրկման էր դատապարտվել 17-ամյա երիտասարդ։ Նա մահապատժի չի դատապարտվել անչափահաս լինելու պատճառով։ Երկու ամբաստանյալներն էլ իրենց մեղավոր չեն ճանաչել։ Մահապատժի դատապարտվածի հայրը BBC-ին ասել է, որ բողոքարկելու է Լահորի բարձրագույն դատարան։