«Չի քանդվի, բայց կվերանորոգվի, կդառնա հյուրանոց»․ Աննա Մայիլյան

Կոնսերվատորիայում այսօր հրավիրվել էր համակոնսերվատորիական ժողով՝ ռեկտորատի կողմից, որին մասնակցում էին դասախոսներ, ուսանողներ, սակայն լրագրողների մուտքն արգելված էր։ Նախքան ժողովը, լրագրողների հետ զրույցում երգչուհի, Կոնսերվատորիայի դասախոս Աննա Մայիլյանը հայտնել է իր մտահոգությունները․ «Ասում են՝ չի քանդվելու Կոնսերվատորիայի շենքը. լավ, չի քանդվելու, բայց հյուրանոցի հրաշալի շենք է, կվերանորոգվի, կդառնա հյուրանոց, ի՞նչ է մնում անել, սենյակները պատրաստ են, դահլիճ ունի, հրաշալի է։ Եթե չկա Կոնսերվատորիան փակելու ծրագիր, թող կնիքված թուղթ ցույց տան։ Անընդհատ հանձնել, հանձնել, հիմա էլ Կոնսերվատորիան, ի՞նչ ենք ուզում աշխարհին ասել... Ուզում եմ հավատալ, որ Կոնսերվատորիայի ռեկտորը կիսում է մեր մտահոգությունը»,- ասել է երգչուհին։