Իրանը խոստանում է հարձակվել ԱՄՆ-ի վրա

Թեհրանն արաբական երկրների միջոցով Վաշինգթոնին հաղորդագրություն է փոխանցել, որ եթե ԱՄՆ-ն միջամտի Իսրայելի և Իրանի միջև հակամարտությանը, տարածաշրջանում ամերիկյան ուժերը հարձակման կենթարկվեն, հայտնում է Axios պորտալը՝ վկայակոչելով երեք ամերիկյան աղբյուրներ։

«Իրանն այս շաբաթվա սկզբին մի քանի արաբական երկրների միջոցով ուղերձ է փոխանցել Բայդենի վարչակազմին՝ եթե ԱՄՆ-ն միջամտի Իսրայելի և Իրանի միջև մարտերին, տարածաշրջանում ամերիկյան ուժերը հարձակման կենթարկվեն»,- ասվում է պորտալում:

Ինչպես ավելի վաղ հայտնել էր CBS News-ը՝ վկայակոչելով ամերիկացի պաշտոնյաներին, Վաշինգթոնն ակնկալում է, որ իրանական հարձակումն Իսրայելի դեմ տեղի կունենա ապրիլի 12-ին, ավելի քան 100 անօդաչու թռչող սարքեր և տասնյակ հրթիռներ կարող են օգտագործվել ռազմական թիրախների դեմ։