«Կիբերհանցագործության դեմ խոշոր գործողության արդյունքում Հայաստանում և Ուկրաինայում 4 մարդ է ձերբակալվել»․ Եվրոպոլ

3042

Հինգշաբթի, 30 մայիսի, 2024 թ., 15:30

4 մարդ է ձերբակալվել, ավելի քան 100 ինտերնետ սերվերներ շարքից հանվել են վնասաբեր ծրագրային ապահովում տարածող ցանցի դեմ միջազգային ոստիկանական գործողության ընթացքում։ Այս մասին հայտնել է Եվրոպոլը։

ԵՄ իրավապահ ծառայությունը մայիսի 27-29-ը բոտնետների դեմ իրականացրած «Վերջնախաղ» գործողությունն անվանել է պատմության մեջ ամենախոշոր նման գործողությունը, հաղորդում է Reuters-ը:

Հետաքննությունը գլխավորել են Գերմանիան, Նիդերլանդները և Ֆրանսիան՝ ԵՄ անդամ չհանդիսացող ևս մի քանի երկրների մասնակցությամբ:

Ձերբակալություններ են իրականացվել Հայաստանում և Ուկրաինայում, նշել է Եվրոպոլը։ 1 մարդ է ձերբակալվել Հայաստանում, ևս 3-ը՝ Ուկրաինայում։ Ավելի քան 2000 դոմեն այժմ գտնվում է ոստիկանության վերահսկողության տակ:

Հետաքննության տվյալներով՝ գլխավոր կասկածյալներից մեկը կրիպտոարժույթով առնվազն 69 մլն եվրո (74,5 մլն դոլար) է վաստակել՝ կայքերը վարձույթով տալով կիբերհանցագործներին՝ շորթող ծրագրեր տարածելու համար: