Բայդենը կշարունակի իր մասնակցությունն ԱՄՆ-ի նախագահական ընտրություններին

ԱՄՆ-ի նախագահ Ջո Բայդենը հայտարարել է, որ կշարունակի մասնակցել նախագահական մրցավազքին՝ չնայած բանավեճում իր անհաջող ելույթին, գրում է Bloomberg-ը։

«Ես հասկանում եմ բանավեճի հետ կապված մտահոգությունները։ Ես հասկանում եմ։ Ես այնքան էլ լավ երեկո չեմ անցկացրել»,- ասել է պետության ղեկավարը քարոզարշավի ընթացքում կազմակերպված դրամահավաքի ժամանակ: Նախագահի խոսքով՝ ինքը չէր առաջադրվի այդ պաշտոնում, «եթե չհավատար, որ կարող է հաղթել»։

Նախագահի կինը՝ Ջիլ Բայդենը, ելույթ ունենալով Գրինվիչ Վիլիջում կայացած բարեգործական միջոցառման ժամանակ, ասել է, որ լիովին աջակցում է ամուսնուն։ «Լսիր, Ջո, մենք թույլ չենք տա, որ 90 րոպեն որոշեն քո՝ նախագահ եղած 4 տարիները»,- ասել է կինն ամուսնուն:

Նախօրեին Axios-ը հայտնել էր, որ Բայդենը կարող է լքել նախագահական մրցավազքը, եթե նրա մերձավոր ազգականներն ու խորհրդականները նման որոշում կայացնեն։

Տարբեր աղբյուրների համաձայն, իրավիճակի վրա կարող են ազդել պետության ղեկավարի կինը՝ Ջիլը, նրա կրտսեր քույրը՝ Վալերի Բայդենը, ընտանիքի ընկեր Թեդ Քաուֆմանը և Սպիտակ տան խորհրդականների փոքր խումբը։ Այս «խոհանոցային կաբինետը» գոյություն ունի տասնամյակներ շարունակ և «որոշում է Բայդենի կյանքի և նախագահության բոլոր որոշումները», պնդում են հրատարակության զրուցակիցները։

Այս մարդիկ, ասում են, հասկանում են, որ հեռուստաբանավեճն «աղետ էր», բայց կարծում են, որ դեռ հույս կա։ Դա պայմանավորված է նրանով, որ 81-ամյա Բայդենը Դոնալդ Թրամփին հաղթելու շատ ավելի մեծ շանսեր ունի, քան փոխնախագահ Քամալա Հարիսը։

CNN-ի հարցումների համաձայն, բանավեճից հետո հեռուստադիտողներն իրենց նախապատվությունը տվել են Թրամփին. նրա օգտին քվեարկել է ամերիկացիների 67%-ը, իսկ Բայդենի օգտին՝ 33%-ը։ Միևնույն ժամանակ, Դեմոկրատական ​​կուսակցությունը ներկայիս նախագահի գործունեությունը գնահատեց՝ որպես ձախողում և սկսեց ակտիվորեն փոխարինող փնտրել նրան, քանի որ Բայդենի իջած ձայնը, մշտական ​​սայթաքումներն ու կողմնորոշման հետ կապված խնդիրները կասկածի տակ էին դնում երկիրը ղեկավարելու՝ նրա կարողությունը, գրել էր Politico-ն: