Բրեքզիթից հետո առաջին անգամ Մեծ Բրիտանիայում համընդհանուր ընտրություններ են սկսվել

Անգլիայի, Շոտլանդիայի, Ուելսի և Հյուսիսային Իռլանդիայի 650 շրջաններում ընտրատեղամասերը բացվել են հինգշաբթի վաղ առավոտյան, հաղորդում է Euronews-ը։

Սա Մեծ Բրիտանիայում առաջին համընդհանուր ընտրություններն են Եվրոմիությունից երկրի դուրս գալուց հետո:

Համայնքների պալատի ընտրությունները կարող են վերջ դնել Պահպանողական կուսակցության 14-ամյա կառավարմանը, որը երկիրը հասցրեց բրեքզիթի։

Քվեարկությունը կտևի մինչև տեղական ժամանակով ժամը 22:00-ն, որից հետո կհրապարակվեն ընտրողների հարցումների հիման վրա առաջին արդյունքները: Արդյունքները կամփոփվեն գիշերվա ընթացքում, և ակնկալվում է, որ տեղական ընտրատարածքների մեծ մասը վաղ առավոտյան կհայտարարի իրենց հաղթող թեկնածուներին: