«Նոր կառավարությունը ՆԱՏՕ-ի հուսալի մասնակիցը կլինի և կաջակցի Կիևին»․ Չարլզ III

Մեծ Բրիտանիայի թագավոր Չարլզ III-ը խոստացել է, որ երկրի նոր կառավարությունը կլինի ՆԱՏՕ-ի հուսալի մասնակից, կշարունակի աջակցել Ուկրաինային և կամրապնդի հարաբերությունները եվրոպացի գործընկերների հետ, գրում է The Guardian-ը:

«Կառավարության հավատարմությունը ՆԱՏՕ-ի իդեալներին կմնա անսասան»,- ասել է թագավորը՝ դիմելով նոր գումարման խորհրդարանի անդամներին: Չարլզ III-ը լեյբորիստների կողմից ձևավորված կառավարության անունից նաև խոստացել է լիակատար աջակցություն Ուկրաինային և նշել է բրիտանական նոր կառավարության մտադրությունը, այն է՝ առաջատար դեր խաղալ Կիևին՝ ՆԱՏՕ-ի անդամակցության հստակ ուղի տրամադրելու գործում։

Միապետը նաև հայտարարել է, որ կառավարությունը՝ Քիր Սթարմերի գլխավորությամբ, մտադիր է ամրապնդել հարաբերությունները եվրոպացի գործընկերների եւ ԵՄ-ի հետ, ինչպես նաեւ ակտիվորեն աշխատել Մերձավոր Արևելքում խաղաղության հաստատման ուղղությամբ: Թագավորը նաև նշել է նոր իշխանությունների մտադրությունը՝ իրականացնել բազմաթիվ բարեփոխումներ, որոնք վերաբերում են ֆինանսներին, ենթակառուցվածքներին, աշխատանքային իրավունքներին, տրանսպորտին, սահմանների անվտանգությանը և այլ ոլորտներին: