«Ուկրաինական կոնֆլիկտի պատճառով Վրաստանում պահպանվում է ահաբեկչությունների ռիսկը»․ Կոբախիձե

Վրաստանում ահաբեկչությունների ռիսկը մեծ է, պատճառն ուկրաինական կոնֆլիկտն է, որը կավարտվի հաջորդ տարի։ Այս մասին «Իմեդի» հեռուստաալիքին տված հարցազրույցում ասել է Վրաստանի վարչապետ Իրակլի Կոբախիձեն։

«Ռիսկերը պահպանվում են այնքան ժամանակ, քանի դեռ շարունակվում է Ուկրաինայում պատերազմը։ Քանի դեռ համատեքստն այդպիսին է, այդ ռիսկերը կպահպանվեն մեր երկրում։ Ելնելով դրանից՝ մենք բազմիցս կրկնել ենք և կարող ենք կրկին կրկնել, որ շատ մեծ հույսեր ենք կապում հաջորդ տարի պատերազմի ավարտի հետ»,- ասել է Կոբախիձեն։

Նա շեշտել է, որ Սլովակիայի վարչապետ Ռոբերտ Ֆիցոյի, ԱՄՆ նախկին նախագահ Դոնալդ Թրամփի և «Վրացական երազանք՝ Ժողովրդավարական Վրաստան» կուսակցության նախագահ Բիձինա Իվանիշվիլիի դեմ մահափորձերը կապ ունեն:

Վրաստանի վարչապետի խոսքով՝ ընդլայնման և հարևանության քաղաքականության հարցերով եվրոհանձնակատար Օլիվեր Վարհեյին իրեն կոչ է արել զգույշ լինել Ֆիցոյի դեմ մահափորձից հետո։ Այդ նախազգուշացումն, ըստ նրա, կասկածելի է։